قاسىم- جومارت توقايەۆ تۇركيادا جۇمىس ىستەپ جاتقان قازاقستان قۇتقارۋشىلارىنا ساتتىلىك تىلەدى
12:39, 09 - اقپان 2023
استانا. قازاقپارات - مەملەكەت باسشىسى قاسىم- جومارت توقايەۆ توتەنشە جاعدايلار ءمينيسترى يۋري يليننىڭ ەسەبىن تىڭدادى. قازاقپارات بۇل تۋرالى اقورداعا سىلتەمە جاساپ حابارلايدى.
مينيستر پرەزيدەنتكە تۇركيانىڭ جويقىن جەر سىلكىنىسىنەن زارداپ شەككەن ايماقتارىندا قازاقستاندىق قۇتقارۋشىلاردىڭ جۇرگىزىپ جاتقان ىزدەستىرۋ- قۇتقارۋ جۇمىستارى تۋرالى باياندادى.
توتەنشە جاعدايلار مينيسترلىگىنىڭ قىزمەتكەرلەرى قيىن جاعدايلارعا قاراماستان، جەرگىلىكتى اتقارۋشى ورگاندارمەن تىعىز بايلانىسا وتىرىپ، جوعارى كاسىبيلىك تانىتىپ، ءوز مىندەتتەرىن ناتيجەلى اتقارىپ جاتىر. ازىرگە امان قالعان 4 ادام قۇتقارىلدى.
مەملەكەت باسشىسىنىڭ تاپسىرماسىمەن قۇتقارۋشىلار مەن كينولوگتار توبى حابارسىز كەتكەن قازاقستان ازاماتتارىن ىزدەۋ ءۇشىن بۇگىن تاڭەرتەڭ حاتاي قالاسىنا كەلدى.
قاسىم- جومارت توقايەۆ قازاقستاندىق قۇتقارۋشىلاردىڭ جۇمىسىنا وڭ باعا بەرىپ، ولارعا ساتتىلىك تىلەدى.