اتىراۋدان رەسەيگە باراتىن جولدى جوندەپ جاتقان كومپانياعا ايىپپۇل سالىندى

اتىراۋ. قازاقپارات - اتىراۋدان رەسەيگە باراتىن جولدى جوندەپ جاتقان كومپانياعا ايىپپۇل سالىندى، دەپ حابارلايدى قازاقپارات ءتىلشىسى.

اتىراۋ وبلىسى بويىنشا ەكولوگيا دەپارتامەنتىنىڭ قىزمەتكەرلەرى «اق جول قۇرىلىس» ج ش س-عا ەكولوگيالىق زاڭنامانى ساقتاۋعا بايلانىستى جوسپاردان تىس تەكسەرۋ جۇرگىزدى. بۇل كومپانيا «اقتوبە - اتىراۋ - رەسەي فەدەراتسياسىنىڭ شەكاراسى» باعىتىنداعى ا-27 رەسپۋبليكالىق ماڭىزى بار جولدىڭ 693-753 شاقىرىمىن رەكونسترۋكسيادان وتكىزىپ جاتىر.

«جوسپاردان تىس تەكسەرۋ كەزىندە زاڭ تالابىنىڭ بۇزىلعانى انىقتالدى. رەسپۋبليكالىق جولعا رەكونسترۋكسيا جۇمىستارىن جۇرگىزۋ ۋچاسكەسىندە - اتىراۋ وبلىسى، يساتاي اۋدانىنداعى جانباي اۋىلىنىڭ ماڭىندا ورنالاسقان وندىرىستىك بازاسىندا بەتون، تەمىر، اعاش، قۇرىلىس ماتەريالدارى، قارا ءتۇستى سۇيىق مايلاردى جينايتىن تەمىر بوشكەلەر اشىق كۇيدە ساقتالعان. باسقا دا قالدىقتاردى جيناۋ ءۇشىن ارنايى جابدىقتالعان ورىندار جوق. قالدىقتار بازا اۋماعىندا ءار جەردە شاشىلىپ جاتىر. وندىرىستىك بازاداعى قوقىس جاشىكتەرىندە ارالاسىپ جاتقان قاعاز، پلاستيكالىق بوتەلكەلەر، كارتون، سەلوفان، تۇرمىستىق قالدىقتار، قۇرىلىس ماتەريالدارى، مايلى شۇبىرەكتەر سەكىلدى قالدىقتار سۇرىپتالماعان»، - دەپ حابارلادى دەپارتامەنتتىڭ باسپا ءسوز قىزمەتىنەن.

دەپارتامەنت قىزمەتكەرلەرى زاڭ تالابىنىڭ بۇزىلۋىنا بايلانىستى «اق جول قۇرىلىس» ج ش س-عا اكىمشىلىك قۇقىق بۇزۋشىلىق تۋرالى حاتتامالار تولتىرعان. كومپانيا اكىمشىلىك ايىپپۇلدى P جەڭىلدىكپەن تولەۋدى سۇراعان. سول سەبەپتەن، كومپانياعا 1 ميلليون 35 مىڭ تەڭگە كولەمىندە اكىمشىلىك ايىپپۇل سالىندى.

ەسكە سالا كەتەلىك، بۇدان بۇرىن اتىراۋدا لاس سۋدان كول جاساعان كاسىپورىنعا 10 ميلليون تەڭگە ايىپپۇل سالىنعانىن حابارلاعان بولاتىنبىز.