ءماجىلىس دەپۋتاتتىعىنا كانديداتتاردى ۇسىنۋ اياقتالدى

استانا. قازاقپارات – ق ر پارلامەنتى ءماجىلىسىنىڭ دەپۋتاتتىعىنا كانديداتتاردى ۇسىنۋ مەرزىمى اياقتالدى، دەپ حابارلايدى قازاقپارات و س ك سايتىنا سىلتەمە جاساپ.

«2023 -جىلعى 8-اقپانداعى جاعداي بويىنشا قازاقستان رەسپۋبليكاسىنىڭ ورتالىق سايلاۋ كوميسسياسىنا كەلەسى ساياسي پارتيالاردىڭ پارتيالىق تىزىمدەرى بويىنشا قازاقستان رەسپۋبليكاسى پارلامەنتى ءماجىلىسىنىڭ دەپۋتاتتىعىنا كانديداتتاردى ۇسىنۋ تۋرالى قۇجاتتار ۇسىنىلدى:

1. «قازاقستان حالىق پارتياسى» قوعامدىق بىرلەستىگى؛

2. «اق جول» قازاقستان دەموكراتيالىق پارتياسى» قوعامدىق بىرلەستىگى؛

3. «جالپىۇلتتىق سوتسيال- دەموكراتيالىق پارتيا» رەسپۋبليكالىق قوعامدىق بىرلەستىگى» ؛

4. «قازاقستاننىڭ «بايتاق» جاسىلدار پارتياسى» قوعامدىق بىرلەستىگى؛

5. «اۋىل» حالىقتىق- دەموكراتيالىق پاتريوتتىق پارتياسى» قوعامدىق بىرلەستىگى؛

6. «AMANAT» پارتياسى» قوعامدىق بىرلەستىگى؛

7. «Respublica» پارتياسى» قوعامدىق بىرلەستىگى»، - دەلىنگەن و س ك-نىڭ اقپاراتتىق حابارلاماسىندا.

ەسكە سالساق، 19-قاڭتاردا مەملەكەت باسشىسى جەتىنشى سايلانعان ق ر پارلامەنتىنىڭ ءماجىلىسىن تاراتۋ جانە ق ر پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىن تاعايىنداۋ تۋرالى جارلىققا قول قويدى.

ءماجىلىس دەپۋتاتتارىن كەزەكتەن تىس سايلاۋ 19-ناۋرىزعا بەلگىلەندى.

سونداي-اق، مەملەكەت باسشىسى بارلىق دەڭگەيدەگى ءماسليحاتتاردىڭ وكىلەتتىگىن توقتاتۋ تۋرالى جارلىققا قول قويدى.

مەملەكەت باسشىسى قاسىم-جومارت توقايەۆ پارلامەنت ءماجىلىسى جانە ءماسليحات دەپۋتاتتارىنىڭ كەزەكتەن تىس سايلاۋىن تاعايىنداۋ تۋرالى مالىمدەمە جاسادى.

بۇعان دەيىن حابارلانعانىنداي، ورتالىق سايلاۋ كوميسسياسىنا 4 ساياسي پارتيا، سونداي-اق بۇگىن Respublica, Amanat, جانە «اۋىل» پارتيالارى 19-ناۋرىزدا وتەتىن كەزەكتەن تىس ءماجىلىس جانە ءماسليحاتتار دەپۋتاتتارى سايلاۋىنا قاتىستى قۇجاتتاردى ورتالىق سايلاۋ كوميسسياسىنا ۇسىندى.

ايتا كەتسەك، ورتالىق سايلاۋ كوميسسياسى ءماجىلىس پەن ءماسليحات دەپۋتاتتارىن سايلاۋدىڭ كۇنتىزبەلىك جوسپارىن بەكىتكەن بولاتىن.

«كانديداتتاردى ۇسىنۋ سايلاۋدى تاعايىنداۋ تۋرالى جارلىق جاريالانعان كۇننەن باستالادى جانە 20 كۇنگە سوزىلادى، 8-اقپاندا ءار ايماقتا جەرگىلىكتى ۋاقىت بويىنشا ساعات 18.00-دە اياقتالادى. ۇمىتكەرلەردى تىركەۋ 20-قاڭتاردان 18-اقپانعا دەيىن جالعاسادى. سايلاۋ الدىنداعى ۇگىت- ناسيحات 18-اقپان كۇنى ساعات 18:00-دە باستالىپ، 18-ناۋرىز ساعات 00:00-گە دەيىن جۇرگىزىلەدى. 18-ناۋرىز - تىنىشتىق كۇنى. 19-ناۋرىز - سايلاۋ كۇنى»، - دەگەن ەدى ق ر ورتالىق سايلاۋ كوميسسياسى ءتوراعاسىنىڭ ورىنباسارى كونستانتين پەتروۆ.