قوستانايداعى پرەزيدەنت رەزيدەنسياسى بالالار يگىلىگىنە بەرىلمەك
ازىرگە كەشەننىڭ قانداي ماقساتتاعى مەكەمەگە اينالاتىنى تۋرالى ناقتى شەشىم قابىلدانعان جوق، دەپ حابارلايدى قازاقپارات ءتىلشىسى.
قوستاناي وبلىسىنىڭ اكىمدىگى بەرگەن مالىمەتكە سۇيەنسەك، ارنايى جۇمىس توبى جاساقتالىپ جاتىر. ونىڭ مۇشەلەرى وبلىس ورتالىعىنان قاشىق ورنالاسقان كەشەن بازاسىندا بالالارعا ارنالعان ناقتى قانداي نىسان قۇرىلاتىنىن شەشەدى. ماسەلە جاقىن كۇندەرى شەشىمىن تاپپاق. ۋادە ەتىلگەندەي، قورىتىندى ۇيعارىم رەسمي تۇردە جاريالانادى.
«مەملەكەت باسشىسىنىڭ تاپسىرماسى ورىندالادى. قازىر عيماراتتى وتكىزۋ جانە ونى پايدالانۋ مەحانيزمى قاراستىرىلىپ جاتىر. قابىلداناتىن شەشىم تۋرالى قوسىمشا حابارلايمىز»، - دەدى قوستاناي وبلىسى اكىمىنىڭ باسپا ءسوز حاتشىسى جۇماتاي كاكىمجانوۆ.
قازىر بۇرىنعى پرەزيدەنت رەزيدەنسياسى ءالى دە ەرەكشە قورعالاتىن نىساندار قاتارىندا. وندا كىرۋگە رۇقسات جوق.
بۇعان دەيىن حابارلانعانىنداي، وبلىس اكىمدىكتەرى رەزيدەنسيالار عيماراتتارىن پايدالانۋ ماقساتىن (بالاباقشا، ساۋىقتىرۋ ورتالىعى، دەمالىس ورنى، ت. ب.) ءوڭىردىڭ قاجەتتىلىگىنە قاراي جەرگىلىكتى جەردە شەشەدى.
بۇعان دەيىن اقتوبە اكىمدىگى بۇرىنعى پرەزيدەنت رەزيدەنسياسىنىڭ بالالارعا ارنالعان دەمالىس نەمەسە ساۋىقتىرۋ ورتالىعىنا اينالاتىنىن راستاعان ەدى.
فوتو: قوستاناي وبلىسىنىڭ اكىمدىگى