سيرياداعى جەر سىلكىنىسىنەن زارداپ شەككەندەر سانى ارتتى
بۇل تۋرالى قازاقپارات ءتىلشىسى ۆەدومستۆونىڭ مالىمدەمەسىنە سىلتەمە جاساپ حابارلايدى.
نەگىزگى قيراۋ الەپپو، لاتاكيا، حاما، تارتۋس پروۆينتسيالارىندا جانە يدليب ايماعىنىڭ اۋىلدىق جەرلەرىندە بولدى.
«بارلىق مەملەكەتتىك جانە جەكەمەنشىك مەديتسينالىق مەكەمەلەر ەسكەرتۋلەر مەن قوڭىراۋلارعا جاۋاپ بەرۋدە، ال مەديتسينا قىزمەتكەرلەرى قىزۋ جۇمىس ىستەۋدە. كەيبىر پروۆينتسيالاردا ۇزدىكسىز ارەكەت ەتۋ شارالارى ۇيلەستىرىلىپ جاتىر»، - دەدى سيريانىڭ دەنساۋلىق ساقتاۋ مينيسترلىگىنەن.
زارداپ شەككەن ايماقتارعا جەدەل جاردەم كولىكتەرى مەن جىلجىمالى كلينيكالار، سونىڭ ىشىندە سيريالىق اراب قىزىل كرەستى جونەلتىلۋدە. سيريانىڭ قان جانە مەديتسينالىق ونەركاسىبى باس ۇيىمى بارلىق ازاماتتارعا قان تاپسىرۋ ۇسىنىستارى ءۇشىن العىس ايتىپ، قان بانكتەرىندە بارلىق قان توبىنىڭ جەتكىلىكتى مولشەرى بار ەكەنىن مالىمدەدى.
«اق كاسكالىلار» اتاۋىمەن بەلگىلى سيريانىڭ ازاماتتىق قورعانىسى ۇكىمەتتىك ەمەس ۇيىمىنىڭ قۇتقارۋ توبى سيريانىڭ سولتۇستىك- باتىسىندا 29 ساعاتتان استام اۋىر جاعدايدا ىزدەۋ- قۇتقارۋ جۇمىستارىنىڭ جالعاسىپ جاتقانىن، 790 نان استام ادام قازا تاۋىپ، 2200 دەن استامى جاراقات العانىن حابارلادى. ۇيىم ءوز بريگادالارىنىڭ ۇلكەن كۇش سالىپ جاتقانىن، ءبىراق ولار اپاتتىڭ تولىق اۋقىمىنا ءالى اتاي الماي وتىرعانىن ايتادى، ويتكەنى جۇزدەگەن ادام ءالى ۇيىندىلەر استىندا قالىپ وتىر.
سيريادا ادام قۇقىقتارىن باقىلاۋ مونيتورينگ ورتالىعىنىڭ (SOHR) مالىمەتىنشە، ەلدە بارلىعى 1597 ادام قازا تاپقان.
سيريا پرەزيدەنتى باشار اساد يران، رەسەي، ب ا ءا، ومان، الجير، باحرەين، يوردانيا، قىتاي، بەلارۋس، پالەستينا جانە يراك باسشىلارىنان تەلەفون قوڭىراۋلارى مەن سيرياعا كوڭىل ايتۋ جانە ىنتىماقتاستىق جەدەلحاتتارىن الدى. سونىمەن قاتار، ليۆان، كۋۆەيت، تۋنيس، ساۋد ارابياسى جانە ۆاتيكان سىندى ايماقتاعى ءبىرقاتار ەلدەر سىرتقى ىستەر مينيسترلەرى ەلگە قولداۋ ءبىلدىردى.