ەۋروپارلامەنت دەپۋتاتتارى تۇركيا مەن سيرياداعى جەر سىلكىنىسىنە قاتىستى مالىمدەمە جاسادى

بريۋسسەل. قازاقپارات - ەۋروپارلامەنتتىڭ جەتەكشى دەپۋتاتتارى بىرلەسكەن مالىمدەمەدە كوپتەگەن قۇرباندار مەن ولاردىڭ وتباسىلارىنا كوڭىل ايتىپ، ەۋروپالىق وداقتىڭ شۇعىل ارەكەتىن قولدايدى، دەپ حابارلايدى قازاقپارات ءتىلشىسى.

ەۋروپارلامەنتتىڭ سىرتقى ىستەر كوميتەتىنىڭ ءتوراعاسى دەۆيد ماكالليستەر، دامۋ كوميتەتىنىڭ ءتوراعاسى توماس توبە جانە ەۋروپارلامەنتتىڭ ماشريكپەن بايلانىس جونىندەگى دەلەگاتسياسىنىڭ جەتەكشىسى يزابەل سانتوس بىلاي مالىمدەدى: «ءبىز مىڭداعان ادامنىڭ ءومىرىن قيعان تۇركيانىڭ وڭتۇستىگى مەن سيريانىڭ سولتۇستىگىندە بولعان كۇشتى جەر سىلكىنىسى سالدارىنان بولعان ادام شىعىنى مەن جان تۇرشىگەرلىك اپاتقا قاتتى قايعىرامىز. ءبىز بار جان- تانىمىزبەن كوپتەگەن قۇرباندار مەن ولاردىڭ وتباسىلارىنا كوڭىل ايتامىز.

ولار ە و ازاماتتىق قورعانىس مەحانيزمى مەن Copernicus سپۋتنيكتىك جۇيەسى بەلسەندىرىلگەننەن كەيىن تۇركيا ءۇشىن ىزدەۋ جانە قۇتقارۋ توپتارىن جۇمىلدىرعان ەۋروپالىق وداقتىڭ شۇعىل كارتا جاساۋ قىزمەتتەرىن كورسەتۋ ءۇشىن دەرەۋ جاۋاپ بەرۋىن ءجون سانايدى.

«سيريانىڭ سولتۇستىگىندەگى كوپ جىلدار بويى قيىن گۋمانيتارلىق جاعدايدى بىلە وتىرىپ، ءبىز زارداپ شەككەندەرگە، اتاپ ايتقاندا ە و گۋمانيتارلىق كومەگىن كورسەتۋ ارقىلى قولداۋ كورسەتۋ بويىنشا ە و- نىڭ ودان ءارى ارەكەتتەرىن قولداۋعا دايىنبىز»، - دەپ اتاپ ءوتتى ەۋروپارلامەنت دەپۋتاتتارى.

6 -اقپاندا ەۋروپالىق وداققا شۆەتسيا ءتوراعالىعى تۇركيا مەن سيرياداعى جەر سىلكىنىسىنە بايلانىستى ە و- عا مۇشە مەملەكەتتەر مەن ەۋروپالىق كوميسسيانى قولداۋ شارالارىن ۇيلەستىرۋ ءۇشىن بىرىككەن ساياسي داعدارىسقا قارسى ارەكەتتى (IPCR) بەلسەندىرۋ تۋرالى شەشىم قابىلدادى.

دۇيسەنبى كۇنى بريۋسسەل قالاسىندا وسى ماسەلە بويىنشا ارنايى ۇيلەستىرۋ كەڭەسى ءوتتى.

داعدارىس، تابيعي اپات، تابيعي نەمەسە تەحنوگەندىك اپات جاعدايىندا ە و كومەك كورسەتۋ جانە جاعدايدى شەشۋ ءۇشىن داعدارىسقا قارسى ارەكەت ەتۋدىڭ بىرنەشە سالالىق تەتىكتەرىن پايدالانا الادى.

بىرىكتىرىلگەن ساياسي داعدارىسقا دەن قويۋ (IPCR) مەحانيزمدەرى اۋىر جانە كۇردەلى داعدارىستارعا، سونىڭ ىشىندە لاڭكەستىك شابۋىلدارعا قاتىستى ە و ساياسي دەڭگەيىندە جىلدام جانە كەلىسىلگەن شەشىم قابىلداۋدى قولدايدى.

وسى مەحانيزم ارقىلى شۆەتسيا 2023 -جىلدىڭ قاڭتارىنان باستاپ جۇزەگە اسىرىپ كەلە جاتقان كەڭەس ءتوراعالىعى ە و ينستيتۋتتارىن، مۇشە مەملەكەتتەردى جانە باسقا دا نەگىزگى سۋبەكتىلەردى بىرىكتىرىپ، تۇركياداعى داعدارىسقا ساياسي رەاكسيانى ۇيلەستىرەدى.

اۆتور

اسحات رايقۇل