اجىراسۋدان قازاقستان الەمدە ەكىنشى ورىندا ەكەنى راس پا؟

استانا. قازاقپارات - الەۋمەتتىك جەلىلەردە جانە كەيبىر ب ا ق-تا قازاقستان 2022 -جىلى اجىراسۋلار سانى بويىنشا الەمدە ەكىنشى ورىندا تۇرعانى تۋرالى اقپارات جاريالاندى.

1000 ادامعا شاققانداعى اجىراسۋلاردىڭ ۇلەسى 4,6 بولدى. بۇل شىندىققا جاناسپايدى، - دەپ حابارلايدى Stopfake.kz.

جەلىدە تاراعان اجىراسۋلار بويىنشا ستاتيستيكالىق مالىمەتتەرگە سايكەس، قازاقستان مالديۆ ارالدارىنان كەيىن الەمدە ەكىنشى ورىندا تۇر، بۇل كەستە advocatsmart.no سايتىنان الىنعان.

كەستە Worldpopulationreview.com سايتىنا سۇيەنەدى. بۇل پورتالدىڭ مالىمەتىنشە، مالديۆ ارالدارىن ەسەپتەمەگەندە، قازاقستاندا الەمنىڭ كەز كەلگەن جەرىنە قاراعاندا ءجيى اجىراسادى ەكەن. بۇل رەتتە ماقالالاردا قانداي دا ءبىر دەرەككوزدەرگە سىلتەمە بەرىلمەگەن. ءبىراق قازاقستان بويىنشا ستاتيستيكالىق اقپاراتقا ارنالعان تۇتاس ءبولىم بار. ونىڭ جارتىسى مۇلدە دۇرىس ەمەس.

مىسالى، وسى پورتالعا سايكەس، استانا حالقىنىڭ سانى نەبارى 345 مىڭ ادام، ال رەسمي ستاتيستيكا بويىنشا 2022 -جىلدىڭ اياعىندا ەلوردادا 1350228 ادام تۇرعان. شىمكەنتتە دە وسىنداي جاعداي. پلاتفورمادا قالادا نەبارى 414 مىڭ ادام تۇرادى دەلىنگەن، ال ءىس جۇزىندە قالا حالقىنىڭ سانى ميلليوننان اسادى.

دەمەك، Worldpopulationreview.com سايتىنداعى اقپاراتقا سەنۋگە بولمايدى.

سونىمەن قاتار ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى جۇلدىز ىسقاقوۆا قازاقستانداعى اجىراسۋدىڭ رەكورد دەڭگەيى تۋرالى جاڭالىقتى جوققا شىعاردى. ول ءوزىنىڭ Facebook-تەگى پاراقشاسىندا تاراعان ستاتيستيكالىق مالىمەتتەر دۇرىس ەمەس دەپ جازدى.

«دوستار، قازىر ءبىرقاتار ب ا ق 2022 -جىلى حالىقتىڭ 1000 ادامىنا شاققاندا 4,6 كورسەتكىشىمەن اجىراسۋ كوەففيتسيەنتى بويىنشا قازاقستان الەمدە 2-ورىنعا شىققانى تۋرالى اقپاراتتى جاريالاپ جاتىر. بۇل اقپاراتقا سەنبەۋلەرىڭىزدى سۇرايمىن، سەبەبى ول قازاقستاندىق ستاتيستيكالىق دەرەكتەرمەن دە، ب ۇ ۇ دەرەكتەرىمەن دە راستالمايدى»، - دەلىنگەن حابارلامادا.

قورىتا ايتقاندا، قازاقستان 2022 -جىلى الەمدەگى اجىراسۋلار سانى بويىنشا ەكىنشى ورىندا تۇرعان جوق. بۇل تۋرالى اقپارات - فەيك.

massaget.kz