تاياقشامەن تاماق جەۋدىڭ پايداسى نەدە؟
سوناۋ كونە زامانداردان بەرى قىتاي، جاپونيا، كورەيا حالقى تاماقتى ارنايى تاياقشالارمەن جەۋگە داعدىلانعان. ولار ءۇشىن اسحانانىڭ ەڭ قاجەتتى قۇرالىن اعاشتىڭ كەز كەلگەن تۇرىنەن جاساي سالۋ وتە ىڭعايلى بولعان ەكەن.
سونداي-اق، مامانداردىڭ ايتۋىنشا، تاماقتى تاياقشامەن جەۋ دەنساۋلىققا پايدالى كورىنەدى. مىسالى، تاياقشامەن تەك اۋىزعا سيارلىق، شايناۋعا ىڭعايلى مولشەردە عانا تاماق جەيسىز. دەنەنىڭ ءتۇرلى نۇكتەلەرىن كاسىبي تۇردە ۋقالاپ ەمدەيتىن قىتايلىقتار تاماقتى تاياقشامەن جەگەندە ادامنىڭ قولىنداعى وتە ماڭىزدى قىرىق نۇكتە قيمىلداۋ ارقىلى اعزاعا پايداسىن تيگىزەتىنىن العا تارتادى.
اتالعان ەلدەردە تاياقشانىڭ ماڭىزدىلىعى سونشالىق - ونى جاڭا وتاۋ قۇرعان جاستارعا جۇپتارى جازىلماسىن دەگەن تىلەكپەن سىيلايدى ەكەن. سونداي-اق جاس نارەستەنىڭ تۋىلعانىنا ءجۇز كۇن تولعاندا دا تاياقشا سىيلاۋ داستۇرگە اينالعان. تاياقشالار بۇگىندە اعاشتان، سۇيەكتەن، ءتىپتى مەتالدان دا جاسالادى.