بالاڭىز تەرشەڭ بە؟ ونىڭ سەبەپتەرىن بىلە ءجۇرىڭىز

استانا. قازاقپارات - تەرلەۋ - قالىپتى پروتسەسس. بۇل پروتسەستىڭ ماقساتى - تەرىنى جانە بۇكىل اعزانى سالقىنداتۋ.

تەمپەراتۋرا دەنەدە ورنالاسقان 2-4 ميلليون ەككريندى تەر بەزدەرى ارقىلى رەتتەلەدى. ولار ادام دۇنيەگە كەلگەن العاشقى كۇننەن باستاپ جۇمىس ىستەيدى. بۇل بەزدەردىڭ ەڭ كوپ مولشەرى تابان، الاقان، بەت، ماڭداي جانە قولتىقتا بولادى.

تەر بەزدەرى ىسكە قوسىلۋ ءۇشىن جۇيكە ۇشتارىنان كەلەتىن ناقتى يمپۋلس كەرەك. وعان مىنا فاكتورلار اسەر ەتەدى:

- ميدان اعزا قىزىپ كەتتى دەگەن بەلگىنىڭ كەلۋى؛

- گورموندار؛

- ەموتسيالار؛

- فيزيكالىق بەلسەندىلىك.

جوعارى تەرشەڭدىكتى گيپەرگيدروز دەپ اتايدى. بۇل پاتولوگيامەن قينالاتىن ادامداردا تەر بەزدەرى بۇل فاكتورلارعا قاتتى اسەر بەرەدى جانە تەر كوپ مولشەردە بولىنەدى. بالا تەرشەڭ بولسا، وعان تەز جەل ءتيىپ، ءجيى اۋىرۋى مۇمكىن.

پاتولوگيالىق تەرشەڭدىكتىڭ قانداي سەبەپتەرى بولادى؟

بالا تەرشەڭدىگىنىڭ ەڭ ءجيى كەزدەسەتىن سەبەبى - اعزاعا D دارۋمەنى، كالتسي جانە تەمىردىڭ جەتىسپەۋشىلىگى.

سونداي-اق جاسىرىن ۆيرۋستى جۇقپالار دا سەبەپ بولادى: سيتومەگالوۆيرۋستار، ەپشتەين-بارر ۆيرۋسى، 1، 2 جانە 6-شى ءتيپتى گەرپەس ۆيرۋسى.

تەرشەڭدىكتىڭ تاعى ءبىر سەبەبى - قالقانشا بەز پروبلەماسى.

جوعارى تەرشەڭدىك اۋىر ۆيرۋستى جانە باكتەريالىق جۇقپالارمەن اۋىرعاننان كەيىن دە كەزدەسەدى. بۇل باكتەريالار مەن ۆيرۋستار توكسيندەر بولەدى، ولار تەر بەزدەرىنە جاناما اسەر ەتەدى.

ەگەر بالاڭىز قاتتى تەرشەڭ بولسا، انەمياعا، D3 دارۋمەنىنە، قالقانشا بەز گورمونىنا جانە جاسىرىن ۆيرۋستارعا زەرتتەۋ جۇرگىزۋ كەرەك. ولاردىڭ ناتيجەلەرىن پەدياتر، جانە ەندوكرينولوگقا كورسەتىپ، قاجەت ەم الۋ كەرەك.