ەگەر عاشىق بولىپ كورگەن بولساڭىز، شىنايى ومىردەگى قارىم-قاتىناس رومانتيكالىق كومەديا سيۋجەتىندەگىدەي ەمەس ەكەنىن بىلەسىز. شىندىعىندا، ەكى سەرىكتەن ۇلكەن شىدامدىلىق پەن كەرەك كەزدە شەگىنۋ قاجەت ەتىلەدى.
دۇرىس قارىم-قاتىناستا ءبىرىن-ءبىرى قۇرمەتتەۋ، سەنۋ، تىڭداي ءبىلۋ جانە ەستي ءبىلۋ ءبىرىنشى ورىنعا شىعادى. سونداي-اق، ەڭ باستىسى - سەرىگىڭىزدى قالاي بار، سولاي قابىلداي الۋ.
مامانداردىڭ ويىنشا، قارىم-قاتىناستى توقتاتۋعا ءبىر سەبەپ جەتكىلىكسىز. ادەتتە، بۇل كوپتەگەن فاكتور اسەر ەتەتىن كەشەندى پروبلەما. ەگەر قارىم-قاتىناستى ساقتاپ قالعىڭىز كەلسە، مىنا ادەتتەردەن ارىلىڭىز.
ۇنەمى ۇيالى تەلەفون ارقىلى باسقا ادامدارمەن سويلەسۋ
سمارتفوندار مەن الەۋمەتتىك جەلىلەرگە تاۋەلدىلىك - ءبىزدىڭ زامانىمىزدىڭ ەپيدەمياسى. كەيدە جاقىندارىڭىز سوققان نەمەسە جۇمىس بويىنشا قوڭىراۋلاردى ەلەمەي قويۋعا بولمايتىن كەزدەر بولادى. ءبىراق سەرىگىڭىزدىڭ جانىندا وتقاندا ۇنەمى الەۋمەتتىك جەلىدەگى حاتتارعا جاۋاپ قايتارىپ نەمەسە ۇيالى تەلەفونمەن سويلەسىپ وتساڭىز، قارىم-قاتىناستا كوپ ۇزاماي كەلىسپەۋشىلىكتەر تۋىندايدى. ەگەر ەكىنشى جارتىڭىز ءسىز ءۇشىن قىمبات بولسا، الاڭداتۋشى قۇرالداردى ىسىرا تۇرىڭىز. ەگەر كەزدەسۋدە جەدەل جاۋاپ بەرۋ كەرەك سۇراق تۋىنداسا، سەرىگىڭىزگە ەسكەرتىڭىز: «شارۋالارىمدى شەشىپ تاستاۋعا 10 مينۋتتاي ۋاقىت بەر، سودان سوڭ مەنىڭ بار نازارىم سەندە بولادى».
جۇرتتىڭ كوزىنشە سەرىگىڭىزدى كەمسىتۋ
ءار ادامنىڭ ءوز كەمشىلىكتەرى بار. ايىرماشىلىق تەك ونى اركىمنىڭ ءارقالاي قابىلداۋىندا. بىرەۋلەر ءوز كەمشىلىگىنە كۇلە قاراسا، باسقالارى بولماشى نارسەنىڭ ءوزىن ۋايىمدايدى. تەك سەرىگىڭىز ەكەۋىڭىز وتقاندا قانداي دا ءبىر كەمشىلىكتەرىڭىزگە نەمەسە ىڭعايسىز ارەكەتتەرىڭىزگە كۇلۋىڭىز مۇمكىن. ءبىراق ولاردى باسقالاردىڭ، اسىرەسە، جاقسى ارالاسپايتىن ادامداردىڭ كوزىنشە ايتپاعان ءجون. مۇنداي ارەكەتىڭىزبەن سەرىگىڭىزدىڭ سەنىمىن جوعالتىپ الۋىڭىز مۇمكىن.
سەرىگىڭىزدىڭ قاتەلىگىن قايتا-قايتا ەسكە ءتۇسىرۋ
ءتىپتى ەڭ ۇيلەسىمدى جۇپتاردىڭ ءوزى ۇساق-تۇيەك ءۇشىن سوزگە كەلەدى. ارينە، ەڭ دۇرىسى - سەرىگىڭىزدى كەشىرىپ، جانجالدى ۇمىتۋ. ءبىراق ايتۋ وڭاي، ىسكە كەلگەندە بۇل ولاي ەمەس. ادەتتە، جۇپتار ۇرىسقان كەزدە ءبىر-ءبىرىنىڭ بۇرىنعى قاتەلىكتەرىن ەسكە تۇسىرەدى. بۇل ادەتكە اينالسا، قارىم-قاتىناستىڭ بۇزىلۋىنا اكەلۋى مۇمكىن.
رەنىشتى ىشتە ساقتاۋ
كوپشىلىك ايەل قانداي دا ءبىر جاعدايلاردى جانجالعا اينالدىرماس ءۇشىن رەنىشىن ىشكە ساقتايدى. جينالىپ قالعان اشۋ مەن نەگاتيۆ ۋاقىت وتە ونىڭ سەرىگىمەن قالاي-سولاي سويلەسۋىنە اكەلەدى. ال سەرىگى نازىك ءارى سۇيكىمدى قىز قالايشا اشۋشاڭ ايەلگە اينالعانىن تۇسىنبەي جۇرەدى. سوندىقتان سەرىگىڭىزبەن ۋاقىتىندا اشىق سويلەسۋ ماڭىزدى.
قارىم-قاتىناستى ۆيرتۋالدى تۇردە تالقىلاۋ
قازىر كوپتەگەن سۇراقتار مەسسەندجەرلەر ارقىلى شەشىلەدى. الايدا پسيحولوگيا ماماندارى كىمدىكى دۇرىس ەكەنىن بۇلاي شەشۋگە كەڭەس بەرمەيدى. مۇڭدى نەمەسە اشۋلى ەمودزيلار ءسىزدىڭ شىنايى ەموتسياڭىزدى جەتكىزە المايدى.
سۇيىكتىڭىزدىڭ تۋىستارىن سىناۋ
كەيدە سەرىگىڭىزدىڭ تۋىستارىمەن ءتىل تابىسۋ قيىنعا سوعادى. ولاردىڭ جاعىمسىز سوزدەرىن ەلەمەۋگە تىرىسىڭىز. سونداي-اق سەرىگىڭىزگە ونىڭ تۋىستارىن جامانداماڭىز.
ونىڭ ءار قادامىن باقىلاپ وتىرۋ
قىزعانۋ - ءار ادامعا تانىس سەزىم. ءبىراق سەرىگىڭىزدىڭ ءوز ءومىرى، جەكە كەڭىستىگى بارىن ۇمىتپاۋ كەرەك. ەگەر كۇمان تۋىنداسا، ول جايلى اشىق سويلەسىڭىز. ۇيلەسىمدى قارىم-قاتىناس ءوزارا سەنىمدىلىكتەن پايدا بولادى. ەگەر سۇيىكتىڭىزدىڭ ءار قادامىن باقىلاپ باستاساڭىز، ودان سەزىمدەرىڭىز قاتايا تۇسپەيدى.
بارلىعىن بىرگە ىستەۋدى قالاۋ
ءار مينۋتتى ونىمەن وتكىزگىڭىز كەلە مە؟ ونىڭ قولى تيمەي قالسا، رەنجىپ قالاسىز با؟ الايدا كەيدە ءوز-وزىڭىزبەن بولۋ جانە جەكە قىزىعۋشىلىعىڭىزدىڭ بولعانى پايدالى.
تومەن ءوزىن-ءوزى باعالاۋ
پسيحولوگيا سالاسىنداعى كەز كەلگەن مامان تومەن ءوزىن-ءوزى باعالاۋ جەكە ومىرگە جاعىمسىز اسەر ەتەتىنىن راستايدى. وزىنە سەنىمسىز ادامدار بارلىق نارسەدەن كۇماندانادى جانە ءوزىنىڭ جەكە كومپلەكستەرىنەن قينالادى. بۇل ءسىزدىڭ قارىم-قاتىناسىڭىزعا اسەر ەتپەي قويمايدى. سوندىقتان ءوزىڭىزدى قولعا الىپ، ءوزىن-ءوزى باعالاۋدى ارتتىرۋدىڭ جولدارىن زەرتتەپ، وزىڭىزبەن جۇمىس ىستەڭىز.
massaget.kz