مەملەكەت باسشىسى: استانادا جىلۋ، سۋ، مەكتەپ، بالاباقشا جانە اۋرۋحانا تاپشىلىعى بار

استانا. قازاقپارات - مەملەكەت باسشىسى قاسىم- جومارت توقايەۆتىڭ توراعالىعىمەن ەلوردانى دامىتۋ ماسەلەلەرى جونىندەگى كەڭەس وتىرىسى ءوتىپ جاتىر، دەپ حابارلايدىتس اقوردا.

«جالپى، ەلوردانىڭ دامۋ بارىسى جامان ەمەس. بىلتىر الەۋمەتتىك- ەكونوميكالىق كورسەتكىشتەر ءوستى. ەل ومىرىندە ەلوردامىزدىڭ ورنى ەرەكشە. وعان قويىلاتىن تالاپ تا جوعارى. بۇل - تەك ەكونوميكاعا بايلانىستى ەمەس، ارحيتەكتۋرالىق، ۋربانيستيكالىق، رۋحاني جانە الەۋمەتتىك سالاعا قاتىسى بار ماسەلە. قازىر شاھاردا جىلۋ، سۋ، مەكتەپ، بالاباقشا جانە اۋرۋحانا تاپشىلىعى بار. ءبىراز جەردە ينتەرنەتتىڭ ساپاسى ناشار. مۇنى اشىق ايتۋىمىز كەرەك. ياعني، وزەكتى ماسەلە از ەمەس. استانا - ۇلكەن قالا، كوشىپ كەلىپ، تۇرىپ جاتقان ازاماتتار كوپ. سول سەبەپتى، الەۋمەتتىك ينفراقۇرىلىمعا اۋىرتپالىق تۇسەدى. سوندىقتان، الداعى جۇمىس بارىسىندا مىناداي ماسەلەلەرگە ايرىقشا نازار اۋدارۋ قاجەت»، - دەدى ق ر پرەزيدەنتى جيىندا.