قىتايدىڭ ءبىر پروۆينسياسىندا وتباسىنداعى بالا سانىنا قويىلعان شەكتەۋ الىنىپ تاستالدى
قىتايدىڭ سىچۋان پروۆينسياسىنىڭ بيلىگى ءار وتباسىنداعى بالا سانىنا قويىلعان شەكتەۋلەردى الىپ تاستادى.
بۇل - ەلدەگى تۋۋ كورسەتكىشىنىڭ تومەندەۋىمەن كۇرەسۋگە باعىتتالعان شارا، دەپ حابارلايدى قازاقپارات BBC-گە سىلتەمە جاساپ.
سونىمەن قاتار، پروۆينتسيا ۇكىمەتى بۇدان بىلاي نەكەسىز بالا تۋعان ايەلدەر دە رەسمي تىركەۋگە الىنىپ، ەرلى-زايىپتىلار سياقتى جەڭىلدىكتەردى الا الادى دەپ شەشتى.
قىتاي زاڭى كۇيەۋگە شىقپاعان ايەلدەردىڭ بالا تۋۋىنا تىيىم سالمايدى، ءبىراق وندا كورسەتىلگەندەي، زاڭ تۇرعىسىنان نەكەلى ايەل انا اتانادى.
بۇدان بىلاي سىچۋان پروۆينسياسىندا تۇرمىسقا شىقپاعان كەز كەلگەن ايەل بالا تۋعىسى كەلسە، مەديتسينالىق كومەككە، مەكتەپتەن ورىن الۋعا جانە اقشالاي تولەمدەرگە جۇگىنە الادى.
قىتاي بيلىگى نەشە جىلدان بەرى «ءبىر وتباسىندا - ءبىر بالا» ساياساتىنىڭ سالدارىنان پايدا بولعان كەلەڭسىز دەموگرافيالىق ءۇردىستى وزگەرتۋگە تىرىسىپ كەلەدى.
وتكەن جىلى قىتاي حالقىنىڭ سانى سوڭعى 60 جىلدا العاش رەت قىسقاردى. بۇرىنعى حالىق سانىنىڭ ازايۋى ماو زىدۋڭنىڭ ەكونوميكالىق ەكسپەريمەنتىنە بايلانىستى بولدى، ول جاپپاي اشارشىلىق پەن ءولىم-ءجىتىمنىڭ ارتۋىنا اكەلگەن.
23-قاڭتاردا قىتاي ۇكىمەتى 2022 -جىلى قىتايدا 9,56 ميلليون ادام دۇنيەگە كەلىپ، 10,41 ميلليون ادام قايتىس بولعانىن كورسەتەتىن ستاتيستيكالىق مالىمەت جاريالادى.
حالىق سانى كەمۋىنىڭ ءبىر سەبەبى - قالا تۇرعىندارىنىڭ كوبى نەكەگە تۇرۋدى جانە بالالى بولۋدى كەيىنگە قالدىرۋدا.
قىتاي ۇلتتىق ستاتيستيكا بيۋروسىنىڭ باسشىسى كان يدىڭ ايتۋىنشا، «بۇل - بالالى بولعىسى كەلەتىندەردىڭ ازايۋىنىڭ، نەكەگە تۇرۋ مەن جۇكتىلىكتى كەيىنگە قالدىرۋدىڭ جانە ەلدە بالا تۋۋ جاسىنداعى ايەلدەر سانىنىڭ ازايۋىنىڭ ناتيجەسى».
سونىمەن قاتار، «ءبىر وتباسىندا - ءبىر بالا» ساياساتىنىڭ جەمىسى. ول 1980 -جىلدىڭ قىركۇيەگىندە ەل حالقىنىڭ باقىلاۋسىز ءوسۋىن ازايتۋ ماقساتىندا ەنگىزىلگەن.
الايدا ونىڭ ناتيجەسى قىتاي حالقىنىڭ گەندەرلىك قاتىناسىنىڭ ەرلەردىڭ پايداسىنا اۋىسۋى بولدى.