اتىراۋدا ەكى كۇننەن بەرى ءيىسى سەزىلىپ تۇرعان ءتۇتىننىڭ وشاعى انىقتالماي جاتىر

اتىراۋ تۇرعىندارى الەۋمەتتىك جەلىدە ءتۇتىننىڭ ءيىسى تۋرالى جارىسا جازىپ جاتىر. تۇرعىنداردىڭ پىكىرىنشە، ءتۇتىننىڭ ءيىسى 29-قاڭتاردا سەزىلگەن.

الايدا، وبلىستىق توتەنشە جاعدايلار دەپارتامەنتىنىڭ بايلانىس توبىنان ءمالىم ەتكەندەي، كاسپي جاعالاۋى مەن «اقجايىق» مەملەكەتتىك تابيعي رەزەرۆاتىنىڭ اۋماعىنان ءورت وشاعى انىقتالماعان.

«دەپارتامەنتتىڭ جەدەل كەزەكشىسى 30-قاڭتاردا «اقجايىق» مەملەكەتتىك تابيعي رەزەرۆاتىنا تەلەفون ارقىلى حابارلاستى. الايدا، رەزەرۆات اۋماعىندا ەشقانداي ءورت وقيعاسى تىركەلمەگەنى بەلگىلى بولدى. ال، «قازاقستان عارىش ساپارى» ا ق- نىڭ عارىشتىق مونيتورينگى ارقىلى اۋەدەن بارلاۋ كەزىندە اتىراۋ وبلىسىنىڭ اۋماعىندا ەشقانداي ءورت وشاقتارى انىقتالعان جوق. وبلىستىڭ بارلىق اۋدانىندا دا دەرەگى تىركەلمەگەن»، - دەپ حابارلادى دەپارتامەنتتىڭ قوعاممەن بايلانىس توبى.

كەشە، 30-قاڭتاردا جەرگىلىكتى ۋاقىتپەن ساعات 20:00 دە قاراڭعى تۇسۋىنە بايلانىستى بارلاۋ جۇمىستارى توقتاتىلدى. ەندى بۇگىن، 31-قاڭتاردا اتىراۋ وبلىستىق توتەنشە جاعدايلار دەپارتامەنتىنىڭ 15 قىزمەتكەرى مەن 3 تەحنيكاسى ءورت وشاقتارىن انىقتاۋ ماقساتىندا بارلاۋ جۇمىستارىن جۇرگىزەتىن بولادى.

«اتىراۋ قالاسىنىڭ اۋماعىندا 30-قاڭتاردا 6 ءورت وقيعاسى تىركەلگەن ەدى. وقيعا ورنىنا جەدەل جەتكەن ءورت سوندىرۋشىلەر ءورت وشاقتارىن ۋاقىتىلى جويدى»، - دەپ ءمالىم ەتتى دەپارتامەنتتىڭ قوعاممەن بايلانىس توبىنان.

ەسكە سالا كەتەلىك، بۇعان دەيىن كاسپي تەڭىزىنىڭ جاعالاۋىنداعى 3 گەكتاردا قامىس ءورتى ءالى بىقسىپ جاتقانىن حابارلاعان بولاتىنبىز.