مەملەكەت باسشىسى جوعارى سوت كەڭەسىنىڭ ءتوراعاسىن قابىلدادى
پرەزيدەنتكە جوعارى سوت كەڭەسىنىڭ 2022 -جىلى اتقارعان جۇمىستارىنىڭ قورىتىندىسى، ەلىمىزدەگى سۋديالار كورپۋسىنىڭ جاي- كۇيى جانە ونىڭ تاپسىرمالارىنىڭ ىسكە اسىرىلۋ بارىسى تۋرالى مالىمەت بەرىلدى.
جوعارى سوت كەڭەسى ءتوراعاسىنىڭ ايتۋىنشا، سۋديالار كورپۋسىنىڭ قۇرامىن قايتا جاڭارتۋ ماقساتىندا قابىلدانعان شارالاردىڭ ناتيجەسىندە بىلتىر سۋديالىق قىزمەتكە ۇسىنىلعان ادامداردىڭ سانى سوت جۇيەسىنەن كەتكەن سۋديالاردىڭ سانىنان اسىپ تۇسكەن.
مەملەكەت باسشىسىنىڭ سوت جۇيەسىنە ناقتى سالا ماماندارىن تارتۋ جونىندە بەرگەن تاپسىرماسىن ورىنداۋ ءۇشىن العاش رەت جەكەلەگەن قۇقىق سالالارىنداعى زاڭگەرلەر اراسىندا كونكۋرس وتكىزىلدى. كونكۋرس جەڭىمپازدارى اۋداندىق دەڭگەيدى اينالىپ ءوتىپ، بىردەن وبلىستىق سوتتىڭ سۋديالارى بولا الادى.
بۇدان بولەك، پرەزيدەنتكە كەڭەستى ينستيتۋتسيونالدى تۇرعىدا نىعايتۋعا جانە ونىڭ قۇزىرەتىنە سوتتاردىڭ كادرلىق ماسەلەلەرىن بەرۋگە، سونداي- اق سۋديالاردىڭ تارتىپتىك جاۋاپكەرشىلىگى ينستيتۋتىن جەتىلدىرۋگە باعىتتالعان جوسپار تۋرالى باياندالدى. سونىمەن قاتار سۋديالاردى ىرىكتەۋ ءىسىن جەتىلدىرۋ جانە ونىڭ اشىقتىعى مەن تيىمدىلىگىن قامتاماسىز ەتۋ جۇمىستارى جالعاسادى.
كەزدەسۋ سوڭىندا مەملەكەت باسشىسى ءبىرقاتار ناقتى تاپسىرما بەرىپ، سوت جۇيەسىندەگى رەفورمالاردى ساپالى جۇزەگە اسىرۋ قاجەتتىگىن اتاپ ءوتتى.