كيىكتەردى ءتالىمباقتا ۇستاۋدىڭ نە كەرەگى بار

استانا. قازاقپارات - ورمان شارۋاشىلىعى جانە جانۋارلار الەمى كوميتەتىنىڭ باس ساراپشىسى اسقار ابدراحمانوۆ كيىكتەردى ءتالىمباقتا ۇستاۋدىڭ نە ءۇشىن قاجەت ەكەنىن ايتتى، دەپ حابارلايدى قازاقپارات ءتىلشىسى.

«كيىكتەردە پاستەرەلليەز دەگەن ىندەت بار. تاريحقا سۇيەنسەك، ءار 6-7 جىلدا قايتالانىپ تۇرادى. 2015 -جىلى بەتپاقدالا پوپۋللياتسياسىنىڭ كيىكتەرى 90 پايىزى قىرىلىپ قالعانى ەستەرىڭىزدە شىعار. وسىنداي جاعدايلاردا كيىكتى ساقتاپ قالۋ ماقساتىمەن ءتالىمباققا ءوسىرۋ كوزدەلىپ وتىر. جارتىلاي ەركىندىكتە ۇستالاتىن كيىكتەرگە پاستەرەلليەز سياقتى ىندەتتەرگە قارسى ەكپە ەگىلەدى. دالاداعى كيىكتەر پاستەرەلليەز ىندەتىنەن، باسقا دا اۋرۋلاردان قىرىلاتىن بولسا، ءتالىمباقتا وسىرىلىگەن كيىكتەردىڭ ەسەبىنەن قالپىنا كەلتىرۋ ءۇشىن پايدالانىلادى»، - دەدى ساراپشى.

بۇعان دەيىن اتالمىش مامان كيىكتەردى ءتالىمداقتا باعۋ ءۇشىن جىل سايىن 250 ميلليون تەڭگە جۇمسالاتىنىن ايتقان بولاتىن.

«عىلىمي- تەحنيكالىق باعىتتاعى قارجىلاندىرۋعا ءوتىنىم بەرىلگەن. سول ءوتىنىم ماقۇلداندى. ەندى بيۋدجەتتى ناقتىلاۋ كەزىندە، ناۋرىز ايىندا بۇل اقشالار قاراستىرىلادى. جىلىنا 250 ميلليون تەڭگە، سوندا ءۇش جىلعا 750 ميلليون تەڭگە ءبولۋ كوزدەلىپ وتىر»، - دەدى ساراپشى.

ال ورمان شارۋاشىلىعى جانە جانۋارلار الەمى كوميتەتىنىڭ ءتوراعاسىنىڭ ورىنباسارى اندرەي كيمنىڭ ايتۋىنشا، ءتالىمباقتاعى كيىكتەردى ءۇي حايۋاناتى رەتىندە قولعا ۇيرەتۋ تاجىريبەسى دە جۇرگىزىلمەك.

«مىسالى، مارال كەزىندە جابايى اڭ بولسا، قازىر جارتىلاي قولعا ۇيرەتىلگەن ءتۇر بولىپ ەسەپتەلەدى. كيىكتى دە وسى ماقساتقا پايدالانۋ ماسەلەسى زەرتتەلىپ جاتىر»، - دەدى كوميتەت باسشىسىنىڭ ورىنباسارى.

فوتو: gov.kz

اۆتور

ەسىمجان ناقتىباي