اسكەردەن كەلگەن جاستارعا ۋنيۆەرسيتەتكە تۇسۋگە قانداي مۇمكىندىكتەر بار

استانا. قازاقپارات – ق ر قورعانىس ءمينيسترىنىڭ كەڭەسشىسى ايگۇل تولەمبايەۆا مەرزىمدى اسكەري قىزمەتىن وتكەرگەن جاستارعا وقۋعا ءتۇسۋ ءۇشىن قانداي جەڭىلدىكتەر قاراستىرىلعانىن ءتۇسىندىردى، دەپ حابارلايدى قازاقپارات ءتىلشىسى.

«2022-جىلدان باستاپ قورعانىس مينيسترلىگى اسكەري قىزمەتتىڭ بەدەلىن ارتتىرۋ، ونىڭ ىشىندە ق ر قارۋلى كۇشتەرىنىڭ، باسقا دا اسكەري قۇرالىمدار قاتارىندا مەرزىمدى اسكەري قىزمەتتىڭ بەلگىلەنگەن مەرزىمىن وتكەرگەن ازاماتتار ءۇشىن ءبىلىم بەرۋ جەڭىلدىكتەرىن الۋ جۇمىسىنا باستاماشى بولدى. بۇل جوباعا جاستار وڭ پىكىرلەرىن ايتىپ جاتىر»، - دەدى ا. تولەمبايەۆا ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

وسى ورايدا ول مەرزىمدى اسكەري قىزمەتتىڭ بەلگىلەنگەن مەرزىمىن وتكەرگەن ازاماتتارعا بەرىلەتىن جەڭىلدىكتەرگە توقتالدى.

بىرىنشىدەن، قىزمەت اياقتالعاننان كەيىن ۇ ب ت- نى ەسكەرمەستەن ەكى جىل ىشىندە اقىلى نەگىزدە ج و و- عا وقۋعا ءتۇسۋ مۇمكىندىگى بار.

«ەكىنشىدەن، جاۋىنگەرلىك دايارلىقتا، جۇكتەلگەن مىندەتتەردى ورىنداۋدا جوعارى ناتيجەلەرگە قول جەتكىزگەن جانە ۇلگىلى اسكەري تارتىبىمەن ەرەكشەلەنگەن اسكەري قىزمەتشىلەرگە ۇ ب ت تاپسىرماي-اق، ج و و ەسەبىنەن وقۋ قۇقىعى بەرىلەدى. بۇدان وزگە، وقۋ ورنىنىڭ اسكەري كافەدراسىندا ەمتيحانسىز تەگىن وقۋعا بولادى. اتاپ ايتقاندا، مەرزىمدى اسكەري قىزمەتىن وتەگەن قاتارداعى جاۋىنگەر بولادى. ال ەگەر وفيتسەر شەنىن العىسى كەلسە، ولار اسكەري كافەدرادا ءبىلىم الىپ، لەيتەنانت اتانادى»، - دەدى ءمينيستردىڭ كەڭەسشىسى.

بۇل كەلىسىم اسكەري قىزمەت وتكەرگەن جانە ورتا مەكتەپتى بىتىرگەنى تۋرالى اتتەستاتى، تەحنيكالىق، كاسىپتىك، ورتا بىلىمنەن كەيىنگى نەمەسە جوعارى ءبىلىمى بار ادامدارعا قاتىستى.

سونىمەن قاتار، مەرزىمدى اسكەري قىزمەتتەن وتكەندەر ق ر قورعانىس مينيسترلىگى وقۋ ورىندارىنا ەمتيحانسىز تۇسە الادى.