توتەنشە جاعداي كەزىندە دە ينتەرنەتى وشىرىلمەيتىن ۇيىمداردىڭ ءتىزىمى جاسالادى
بۇل پىكىردى ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين ايتتى، دەپ حابارلايدى قازاقپارات ءتىلشىسى.
ءمينيستردىڭ ايتۋىنشا، ينتەرنەت الاياقتىعىنا قارسى كۇرەس ماقساتىندا ۇيالى بايلانىس وپەراتورلارىمەن بىرلەسىپ، الاياقتىق ارەكەتتەردى بۇعاتتاۋ بويىنشا تاسىلدەر ازىرلەندى، اتاپ ايتقاندا حالىقارالىق ترافيكتى وڭدەۋ جانە ولاردى بۇعاتتاۋ، اۋىستىرىلاتىن نومىرلەردى انىقتاۋ تاسىلدەرى قولدانىلادى.
«وعان قوسا، قاڭتار وقيعالارى ت ج كەزىندە بايلانىس جەلىلەرىنىڭ جۇمىسىن توقتاتپاۋى ءتيىس ەكەنىن كورسەتتى. ءبىرقاتار ومىرلىك ماڭىزدى وبەكتىلەر، مەملەكەتتىك جانە جەكە ۇيىمدار ينتەرنەت جەلىسىنە ۇزدىكسىز قوسىلىپ تۇرۋعا ءتيىس. ياعني، ەكونوميكا جۇمىس ىستەۋى كەرەك»، - دەدى باعدات مۋسين مينيسترلىكتىڭ كەڭەيتىلگەن القا وتىرىسىندا.
سوندىقتان مينيسترلىك دەرەكتەردى بەرۋ جەلىلەرىنىڭ ستاتيكالىق مەكەنجايىنىڭ ءتىزىمىن جاساۋ جانە جۇرگىزۋ قاعيدالارىن بەكىتكەن.
«بۇل ت ج كەزىندە ينتەرنەتكە ۇزدىكسىز قول جەتكىزە الاتىن ۇيىمداردىڭ ءتىزىمىن جاساۋعا مۇمكىندىك بەرەدى»، - دەدى باعدات مۋسين.