تەلەارنا مالىمەتىنشە، ونى ءتارتىپ ساقشىلارى دەرەۋ تارتىپ الىپ، ايىپپۇل تۇراعىنا قويعان. ال جۇرگىزۋشىلەر ادال اقشاعا العان كولىگىمىزدىڭ وسى ۋاقىتقا دەيىن قىلمىسقا قاتىسى بارىن بىلمەدىك دەپ اقتالعان.
«زاڭداستىرۋ كەزىندە ءبىلىپ تۇرمىن عوي. كەشە ۇستاعاننان كەيىن ءبىلىپ تۇرمىن. وعان دەيىن ماعان ەشتەڭە ىستەگەن جوق.»مىناۋ ۇرلانعان«دەدى دە، جاۋىپ تاستادى. ءتورت ميلليونعا ساتىپ العان اقشام دالاعا كەتتى»، - دەيدى اقتوبە تۇرعىنى ازات ناعىمانوۆ.
ءبىر جىل ايداعان كولىگىنەن ايىرىلعان ازات ناعىمانوۆ پوليتسيا باسقارماسى مەن حالىققا قىزمەت كورسەتۋ ورتالىعىنىڭ اراسىندا ءجۇر. رەسەي ءنومىرلى كولىگىن اۋدان تۇرعىنىنان ساتىپ العان. ءتارتىپ ساقشىلارىنىڭ سوزىنشە، ولار ىزدەۋدە جۇرگەن، قىلمىسقا قاتىسى بار كەز كەلگەن كولىكتى ايىپپۇل تۇراعىنا قويۋعا مىندەتتى.
تەلەارنا مالىمەتىنشە، جالپى ەلىمىزدە شەتەلدىك كولىكتەردى زاڭداستىرۋ باستالعالى ەكى مىڭنان اسا ءوتىنىش تۇسكەن. سونىڭ تەك 200 گە جۋىعىنا عانا قازاقستاندىق ءنومىر بەرىلدى. قۇجات تاپسىرۋشىلار كوپ بولعاندىقتان، حالىققا قىزمەت كورسەتۋ ورتالىعىنىڭ جۇمىس كەستەسى دە وزگەرگەن. ەندى ماماندار بۇرىنعىدان ەكى ساعاتقا ارتىق جانە سەنبى كۇنى دە جۇمىس ىستەيدى.
«كوبىنىڭ ءوتىنىشىن قاناعاتتاندىرماي جاتىر. ءتۇرلى سەبەپ بار. ەڭ الدىمەن - ءوتىنىشتىڭ دۇرىس تولتىرىلماۋى. ودان سوڭ بىلتىر 1-قىركۇيەكتەن كەيىن ەلگە اكەلگەن كولىگىن زاڭداستىرعىسى كەلەدى. كەدەن تەكسەرۋى نەمەسە وزگە ەلدە قانداي دا ءبىر شەكتەۋى بار كولىك بولىپ شىعادى»، - دەيدى اقتوبە مامانداندىرىلعان حالىققا قىزمەت كورسەتۋ ورتالىعى باسشىسىنىڭ مىندەتىن اتقارۋشى سامات تولەۋوۆ.