مەملەكەت قارجىلاندىراتىن سپورت تۇرلەرىنە توعىزقۇمالاق پەن اسىق اتۋدى قوسۋ ۇسىنىلدى

استانا. قازاقپارات - پرەمەر- ءمينيستردىڭ ورىنباسارى التاي كولگىنوۆ مەملەكەت قارجىلاندىراتىن سپورت تۇرلەرىنە توعىزقۇمالاق پەن اسىق اتۋدى قوسۋدى ۇسىندى، دەپ حابارلايدى قازاقپارات ءتىلشىسى.

«ۇلتتىق سپورتتى دامىتۋ مىندەتى تۇر. بۇگىنگى كۇنى ەلىمىزدىڭ 500 مىڭنان اسا ازاماتى ۇلتتىق سپورت تۇرلەرىمەن اينالىسادى. ول وتە جاقسى. ءبىراق، ونى ارى قاراي دامىتۋ كەرەك. ءداستۇرلى سپورتتى بالالار اراسىندا دارىپتەپ، ۇرپاعىمىزعا دۇرىس تاربيە بەرۋ مىندەتى الىمىزدا تۇر. وسى ماقساتتا ءبىلىم بەرۋ ۇيىمدارىندا دەنە تاربيەسى ساباقتارىندا ۇلتتىق سپورت تۇرلەرى بويىنشا مىندەتتى كومپونەنت قولدانىسقا ەنگىزىلدى. قازاق كۇرەسى مەملەكەتتىك سپورتتىق تاپسىرىس اياسىندا قارجىلاندىرىلاتىن سپورت سەكتسيالارىنىڭ قاتارىنا قوسىلدى. مەملەكەتتىك سپورتتىق قارجىلاندىرىلاتىن سپورت تۇرلەرىنىڭ قاتارىنا توعىزقۇمالاق پەن اسىق اتۋدى قوسۋ ۇسىنىستارى دا ءتۇسىپ جاتىر. مينيسترلىككە مۇنى دا قاراۋدى سۇرايمىز»، - دەدى التاي كولگىنوۆ مادەنيەت جانە سپورت مينيسترلىگىنىڭ كەڭەيتىلگەن القا وتىرىسىندا.

ونىڭ اتاپ وتۋىنشە، ۇلتتىق سپورت سالاسىندا قازاقستاننىڭ الەۋەتى زور.

«تۇركيادا وتكەن ءتورتىنشى دۇنيەجۇزىلىك كوشپەندىلەر ويىندارىندا جاقسى ناتيجە كورسەتىپ، 9 جۇلدەگە قول جەتكىزىلدى. كەلەسى بەسىنشى كوشپەندىلەر ويىندارى 2024 -جىلى قازاقستاندا وتەدى. سوعان قازىردەن دايىندالۋ كەرەك. فەدەراتسياعا كومەك كورسەتەمىز»، - دەدى ۆيتسە- پرەمەر.