«قالامىزدا مۇنداي پروبلەمالار بارى جاسىرىن ەمەس. نەگىزىنەن قۇرىلىسى ءجۇرىپ جاتقان جاڭا اۋداندار مەن ەلدى مەكەندەردە كەزدەسەدى. سونداي-اق ينتەرنەت قۇرىلىس قارقىنىنا ىلەسە الماي كەلە جاتقان جاعداي بار»، - دەپ جازدى ول Instagram-داعى پاراقشاسىندا.
اكىمنىڭ سوزىنشە، قۇرىلىس كومپانيالارىنا بايلانىس عيماراتتارىنىڭ دا قۇرىلىسىن ەسكەرۋ تاپسىرىلاتىن بولادى. ال بايلانىس وپەراتورلارى مەن وزگە دە جاۋاپتى ورگاندار قۇرىلىستى جوسپارلاۋعا قاتىسادى. بۇل ماسەلەلەردى ج. قاسىمبەك سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسينمەن، «قازاقتەلەكوم» باسشىسى قۋانىشبەك ەسەكەيەۆپەن، ۇيالى بايلانىس وپەراتورلارىنىڭ وكىلدەرىمەن جانە تاعى باسقا ورگاندارمەن پىسىقتاعان.
«قالادا ينتەرنەتتىڭ ساپاسىن جاقسارتۋ ءۇشىن بىرنەشە مەحانيزمدى قولدانامىز. ولار - وپتيكالىق بايلانىس جەلىلەرىن، انتەننا- دىڭگەك قۇرىلىسىن، FWA (Fixed Wireless Access) تەحنولوگياسى بويىنشا بازالىق ستانتسيالاردى ورناتۋ. بۇل جۇمىسقا ينۆەستورلاردى دا جۇمىلدىرامىز.
سونىمەن قاتار جارىقتاندىرۋ جانە ەلەكتر جەلىسىنىڭ تىرەكتەرى بويىنشا وپتيكالىق بايلانىس جەلىلەرىن جۇرگىزۋ ماسەلەسى پىسىقتالدى. بۇل ەلدى مەكەندەردەگى ينتەرنەت ساپاسىن ەداۋىر جاقسارتادى. كوكتال-1، اگروقالاشىق، ينتەرناتسيونالنىي، وڭتۇستىك- شىعىس، پرومىشلەننىي، تەلمان، ميچۋرين، قازقالاشىق، كيرپيچنىي ەلدى مەكەندەرىندە وپتيكالىق بايلانىس جەلىلەرىن سالۋ جۇمىسى ءجۇرىپ جاتىر. تاعى 3 ەلدى مەكەن بويىنشا ينۆەستورلار تارتامىز.
ءبىراق مۇنىڭ ءوزى دە جەتكىلىكسىز. قالا كۇننەن كۇنگە ءوسىپ جاتىر، ال ەلوردا تۇرعىندارى جىل سايىن 50-60 مىڭ ادامعا ارتىپ كەلەدى. قولدا بار ينفراقۇرىلىمعا ءمان بەرىپ قانا قويماي، بولاشاقتى ويلاپ، الدىن الا دامىتۋ قاجەت. سول سەبەپتى الدىمىزدا مۇنداي پروبلەمالار سانىن ازايتۋ ءارى قۇرىلىس كەزەڭىندە بايلانىس قۇرىلىمدارىن قوسا سالۋ مىندەتى تۇر»، - دەدى جەڭىس قاسىمبەك.