«جاقىندا ەلىمىزدىڭ ەكى ازاماتى قازاقستانعا جەتتى. جۇما كۇنى تۋىستارى حابارلاسىپ، ميانماداعى كومپانيادان قاشىپ شىققاندارى تۋرالى ايتتى. ءبىزدىڭ كونسۋل دەرەۋ تايلاندتىڭ شەكاراسىنا بارىپ، ميانماداعى شاعىن قالاشىقتىڭ شەتىنەن ولاردى الىپ كەتتى. وسى ورايدا ولارعا قاۋىپسىز جەرگە جاسىرىنۋعا نۇسقاۋ بەردىك. ويتكەنى اتالعان كومپانيا وكىلدەرى ولاردى ىزدەيتىن بولسا، بۇل ازاماتتاردى دەرەۋ تاۋىپ الاتىنى انىق ەدى. جەرگىلىكتى تۇرعىندار دا وسى كومپانياعا كومەكتەسۋى مۇمكىن ەدى»، - ا. سمادياروۆ.
ونىڭ ايتۋىنشا، قازاقستان ازاماتتارى بانگكوككە جەتكىزىلگەننەن كەيىن، ولاردىڭ قۇجاتتارى راسىمدەلگەن. كوشى- قون زاڭناماسىن بۇزۋ دەرەكتەرىنە قاتىستى ايىپپۇلدارى تولەندى.
«سونىمەن قاتار، ولارعا قاتار ارقىلى اۋە كولىگىمەن ۇشىپ كەلۋ ءۇشىن بيلەت ساتىپ الىنىپ، كەيىن الماتىعا جەتكىزىلدى»، - دەدى رەسمي وكىل.
بۇدان بۇرىن حابارلانعانداي، 16- قاڭتار كۇنى ق ر سىرتقى ىستەر مينيسترلىگى ب ا ق وكىلدەرىنە تايلاند پەن ميانما ەلدەرىندە قۇلدىققا تاپ بولعانى تۋرالى مالىمدەگەن قازاقستاندىقتاردىڭ جاعدايى تۋرالى مالىمەت بەرگەن. «ول ازاماتتار بويىنشا قازىر جۇمىستى جالعاستىرۋدامىز. تايلان، ميانما ەلدەرىنىڭ سىرتقى ىستەر مينيسترلىكتەرىمەن بايلانىستامىز. وزدەرىڭىز بىلەتىندەي، بۇل - حالىقارالىق- كريمينالدىق توپتاردىڭ ءىسى. بۇل «التىن ءۇشبۇرىش» دەپ اتالاتىن جەر. ول جەردە بيلىك تە جوق، بايلانىس تا جوق»، - دەگەن بولاتىن س ءى م رەسمي وكىلى ايبەك سمادياروۆ.
ونىڭ ايتۋىنا قاراعاندا، ازىرگە ەكى ازاماتتان عانا رەسمي ءوتىنىش تۇسكەن.
«قازىر ءبىزدىڭ ازاماتتار سول جەردە. ەكى ازامات بىزگە ءوتىنىش ءبىلدىردى. تەكسەرىلمەگەن اقپاراتتار بويىنشا تاعى باسقا ازاماتتار بار دەپ ەستىپ جاتىرمىز. ولارعا ايتارىمىز، ءبىزدى ەستىپ جاتسا، سىزدەردى وقىپ جاتسا، اتى- جوندەرىن ناقتى اتاپ، وزدەرى تۋرالى مالىمەت بەرسىن، قورىقپاسىن»، - دەگەن مينيسترلىك وكىلى.
فوتو: gov.kz