قازاقستان سپورتشىلارى حالىقارالىق جارىس الدىندا پسيحولوگيالىق دايىندىقتان وتەتىن بولدى
بۇل تۋرالى مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ سپورتتى دامىتۋ ديرەكسياسىنان ءمالىم ەتتى، دەپ حابارلايدى قازاقپارات.
ءىس-شاراعا قاتىسۋعا 150 دەن استام ادام نيەت بىلدىرگەن، ولاردىڭ اراسىندا باپكەرلەر، سپورتشىلار، ۇلتتىق قۇرامالاردىڭ دارىگەرلەرى جانە وسى سالانىڭ وزگە دە قىزمەتكەرلەرى بار.
ازەربايجان مەملەكەتتىك سپورت جانە دەنە شىنىقتىرۋ اكادەمياسىنىڭ سپورت پسيحولوگياسى بويىنشا وكىتۋشىسى، پسيحولوگ نارمين احمەدزادە استاناعا ارنايى كەلىپ، ءوز تاجىريبەسىن ورتاعا سالدى.
«بىلتىر ق ر مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتىنىڭ سپورتتى دامىتۋ ديرەكتسياسىنا فەدەراتسيانىڭ باس باپكەرلەرى ەسەپ بەرگەن بولاتىن. وتىرىستا الداعى جىلعا ارنالعان جوسپارلار تالقىلانىپ، وتاندىق سپورتقا پسيحولوگيا سالاسى جەتىسپەيتىنى بەلگىلى بولدى. بولاشاقتا بۇل جۇمىس تىعىز جانە جەمىستى جۇرگىزىلۋى كەرەك. بيىل ءبىزدى 6 كەشەندى جارىس كۇتىپ تۇر، ولاردىڭ ىشىندە ەڭ باستىسى قىتايداعى جازعى ازيا ويىندارى. بۇگىنگى ارنايى قوناعىمىزدىڭ كەلۋى پاريج-2024 وليمپياداسىنىڭ دايىندىعىنا زور ىقپال تيگىزەدى»، - دەدى سپورتتى دامىتۋ ديرەكسياسىنىڭ ديرەكتورى ورالباي جاقسىمبەتوۆ.
ەكى كۇنگە سوزىلعان باس قوسۋ بارىسىندا جارىس كەزىندە اتلەتتەردى قالپىنا كەلتىرۋ، پسيحولوگيا نەگىزدەرىنە ارنالعان زاماناۋي ادىستەر تۋرالى اڭگىمە ءوربىدى.
كونفەرەنسيا سوڭىندا كەلەشەكتە بىرلەسىپ اتقاراتىن جۇمىستارعا ۇسىنىستار قاراستىرىلىپ، ورتاق شەشىمدەر ناقتىلاندى.