ەنەرگەتيكالىق سۋسىنداردىڭ دەنساۋلىققا زاردابى قانداي - دارىگەرمەن سۇحبات
- ايدانا مۇراتبەك قىزى، ەنەرگەتيكالىق سۋسىندار ادام اعزاسىنا قانشالىقتى قاۋىپتى؟
- ەنەرگەتيكالىق سۋسىندى ىشكەندە ەشقانداي ەنەرگيا كەلمەيدى. ول كەرىسىنشە ادامدى شارشاعانىن ءوزى سەزبەيتىن كۇيگە ۇشىراتادى. ناتيجەسىندە ادام اعزاسى شامادان تىس ەنەرگيا جۇمساپ، اعزاسىنا ۇلكەن زاقىم كەلتىرەدى. الدامشى سەرگەكتىك سىيلايتىن سۋسىننىڭ اسەرى شامەن 2-3 ساعاتتان سوڭ قايتىپ، ادام اعزاسى قاتتى شارشاڭقى كۇيگە ۇشىرايدى.
- بۇل ەنەرگەتيكالىق سۋسىنداردىڭ قۇرامىنداعى زاتتارعا بايلانىستى عوي...
- كەز كەلگەن ەنەرگەتيكالىق سۋسىننىڭ قۇرامىندا ادەتتە تاۋرين مەن كوفەين بولادى. ال، ولاردىڭ كوپ بولىگى ساحاروزا نەمەسە گليۋكوزادان تۇرادى. تاۋرين جۇرەك بۇلشىقەتىنىڭ ارەكەتىنە اسەر ەتسە، گليۋكوزا مەن ساحاروزانىڭ كوپ مولشەرى قانت ديابەتىنىڭ، اسقازان- ىشەك جولدارى اۋرۋلارىنىڭ دامۋ قاۋپىن ارتتىرادى.
سونىمەن بىرگە، سۋسىندى ىشكەن كەزدە ولار ادام ەنەرگياسىن بىردەن وياتادى. سەبەبى، ادام اعزاسىنا سيگنال بەرۋشى - مي گليۋكوزامەن قورەكتەنەدى. ال، كوفەين بولسا اعزا شارشاعاندا جاۋاپ بەرەتىن ادەنوزين رەتسەپتورلارىن بۇعاتتايدى. قالىپتى اعزا شارشاعاندا ادەنوزين رەتسەپتورلارى جۇمىس ىستەپ، ۇيقى شاقىرادى، ارىقاراي ادام دەمالۋمەن قان اينالىمى، ەنەرگياسى، جالپى دەنساۋلىعى قالىپقا كەلتىرىلەدى.
- ەنەرگەتيكالىق سۋسىنداردى ءجيى ىشەتىن ادامداردا قانداي اۋرۋلار كەزدەسۋى مۇمكىن؟
- ەنەرگەتيكتەردى ءجيى ىشەتىن ادامداردا اس- قازان ىشەك اۋرۋلارى، اسقازان جاراسى، جۇرەك- قان تامىرلارى اۋرۋلارى، قانت ديابەتى، ۇيقى رەجيمىنىڭ بۇزىلۋىنان دەپرەسسيعا ۇشىراۋ، ءتىس جەگى سىندى، باسقا دا اۋرۋلار پايدا بولۋى ابدەن مۇمكىن.
- ءسىزدىڭ ويىڭىزشا الماتىدا ەنەرگەتيكالىق سۋسىنداردى قاي جاستاعى ازاماتتار كوپ قولدانادى؟
- قازىرگى تاڭدا ەنەرگەتيكالىق سۋسىنداردىڭ ەركىن ساتىلۋىنا بايلانىستى مەكتەپ جاسىنداعى جاسوسپىرىمدەر كوپتەپ تۇتىناتىنى بايقالادى، ياعني 11-15 جاس اراسىنداعى جاسوسپىرىمدەردىڭ % 40- دان استامى ەنەرگەتيكالىق سۋسىنداردى كۇندەلىكتى تۇتىنادى. بۇل دەگەنىمىز بۇعاناسى قاتپاعان جاسوسپىرىمدەردىڭ دەنساۋلىعىنا وراسان زيان كەلىپ جاتىر.
- ەنەرگەتيكالىق سۋسىنداردى كىمدەرگە مۇلدەم ىشۋگە بولمايدى؟
- 15 جاسقا تولماعان ادامدارعا جانە سوزىلمالى اۋرۋلارى بار ادامدارعا ىشۋگە بولمايدى. ەنەرگەتيكالىق سۋسىنداردى ىشكەننەن اۋىرعان ازاماتتار كوبىنە ەندوكريندىق اۋرۋلارعا شاعىم ايتىپ كەلەدى. وكىنىشكە وراي، الماتى دۇكەندەرىندە ەنەرگەتيكالىق سۋسىندار ەركىن ساتىلىمدا. سوندىقتان، ولاردى ەلىمىزدە ساتۋدى دۇرىس جولعا قويۋ قاجەت دەپ ويلايمىن.
- سۇحباتىڭىزعا راحمەت.
اۆتور
دۋمان ارعىنگەلدى