بۇل تۋرالى مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆ ۆەدومستۆونىڭ كەڭەيتىلگەن القا وتىرىسىندا ايتتى، دەپ حابارلايدى قازاقپارات ءتىلشىسى.
اگەنتتىك مەملەكەتتىك قىزمەتكە ىرىكتەۋ مەن ونى وتكەرۋدى تولىق سيفرلاندىرۋ ارقىلى «ە- قىزمەت» ىقپالداستىرىلعان اقپاراتتىق جۇيەسىن جاڭعىرتۋ بويىنشا جۇمىستار جۇرگىزدى. ءبىرىنشى كەزەكتە «ە-قىزمەت» جۇيەسىنىڭ سىرتقى پورتالى جاسالدى. سىرتقى پورتالدا مەملەكەتتىك قىزمەتكە جاڭا ىرىكتەۋ الگوريتىمى ازىرلەندى، وندا كونكۋرستىق ءراسىمدى وتكىزۋ فورماتى قايتا قارالدى. كونكۋرستىق ءراسىمنىڭ جاڭا فورماتى ۇمىتكەرلەرگە الدىن الا بەلگىلەنگەن ۋاقىتتا وتەتىن اڭگىمەلەسۋدەن باسقا بارلىق كەزەڭدەردە، كەز كەلگەن ۋاقىتتا جانە الەمنىڭ كەز كەلگەن نۇكتەسىنەن كونكۋرسقا قاتىسۋعا مۇمكىندىك بەرەدى. ءبىزدىڭ جوسپارىمىز - جاڭا ىرىكتەۋ جۇيەسىن پيلوتتىق سىناقتان وتكىزۋ. پيلوت 1- ناۋرىزدان باستاپ 5 مەملەكەتتىك ورگاندا وتەتىن بولادى»، - دەدى اگەنتتىك ءتوراعاسى.
ونىڭ ناقتىلاي تۇسۋىنشە، جۇيە مەملەكەتتىك قىزمەت ىستەرى اگەنتتىگىندە، يندۋستريا جانە ينفراقۇرىلىمدىق دامۋ، ساۋدا جانە ينتەگراتسيا مينيسترلىكتەرىندە، اقمولا وبلىسى مەن شىمكەنت قالاسى اكىمدىكتەرىندە سىناقتان وتكىزىلەدى.
«ە- قىزمەتتە» بارلىق ماڭىزدى اقپاراتتىق جۇيەلەرمەن ينتەگراتسيا جاسادىق. ول مەملەكەتتىك قىزمەتكە ۇمىتكەرلەردى ارتىق قۇجات جيناۋدان بوساتادى. وزگە اقپاراتتىق جۇيەلەردەن ۇمىتكەر تۋرالى اقپارات الۋ، ونىڭ سوتتىلىعى نەمەسە وزگە بۇزۋشىلىقتارعا قاتىسى بار-جوعىن تەكسەرۋ، بىلىكتىلىك تالاپتارىنا ساي كەلۋىن قاراۋ - مۇنىڭ ءبارىن اۆتوماتتى تۇردە جۇيە ءوزى جاسايتىن بولادى»، - دەدى دارحان جازىقبايەۆ.