قارجى مينيسترلىگىنىڭ ەڭ ءبىرىنشى ماقساتى - الەۋمەتتىك مىندەتتەمەلەردى ۋاقتىلى ورىنداۋ - سمايىلوۆ
ق ر پرەمەر-ءمينيسترى ءاليحان سمايىلوۆ قارجى ۆەدومستۆونىڭ كەڭەيتىلگەن القا ماجىلىسىندە وسىنداي مىندەتتەر قويدى، دەپ حابارلايدى قازاقپارات ءتىلشىسى.
«مينيسترلىكتىڭ ەڭ ءبىرىنشى ماقساتى - حالىق الدىنداعى الەۋمەتتىك مىندەتتەمەلەردى ۋاقىتىلى ورىنداۋ.
مەملەكەتتىڭ شىعىستارى جىل سايىن ءوسىپ كەلەدى. ءبىراق، سوعان قاراماستان بيۋجەتتىڭ كىرىس بولىگىن ارتتىرۋ مينيسترلىك جۇمىسىنىڭ باستى باسىمدىعى بولىپ قالا بەرەدى.
سالىقتار مەن كەدەندىك باجداردىڭ جينالۋىن ارتتىرۋ جانە سالىق سالىناتىن بازانى كەڭەيتۋ ءۇشىن تۇبەگەيلى شارالار قابىلداۋ قاجەت.
سالىق تولەۋشىلەر مەن سالىق ورگاندارىنىڭ ءوزارا قارىم-قاتىناسى سيفرلاندىرۋ ارقىلى سەرۆيستىك مودەل نەگىزىندە قۇرىلۋى ءتيىس»، - دەدى ول.
سونداي-اق، ول سالىق جانە كەدەن جۇيەلەرىنىڭ ينتەگراتسياسىن تولىقتاي ىسكە اسىرۋ قاجەتتىگىن اتادى.
«ءبىر تەرەزە» قاعيداتى بويىنشا ەنگىزىلەتىن كەدەندىك باقىلاۋ بيزنەس-قوعامداستىققا وڭ اسەر ەتۋى ءتيىس. جالپى، جاڭا سالىق كودەكسىن ازىرلەۋ شەڭبەرىندە سالىقتىق-كەدەندىك اكىمشىلەندىرۋدى جاڭارتۋدى «اتامەكەن» پالاتاسىمەن جانە ساراپشىلارمەن بىرگە ءوزارا تىعىز ءىس-قيمىلدا قامتاماسىز ەتۋ قاجەت»، - دەدى ۇكىمەت باسشىسى.