ح ش ف قازاقستاندا وتكەن بليتس-شاحماتتان الەم چەمپيوناتىن جوعارى باعالادى
بۇل تۋرالى ورتالىق كوممۋنيكاتسيالار قىزمەتىندە وتكەن بريفينگىدە قازاقستان شاحمات فەدەراتسياسىنىڭ ۆيتسە-پرەزيدەنتى دارمەن ءسادۋاقاسوۆ ايتتى، دەپ حابارلايدى قازاقپارات ءتىلشىسى.
«بۇل قازاقستان ءۇشىن ەرەكشە وقيعا بولدى. چەمپيونات بۇرىنعىعا قاراعاندا ۇلكەن ماسشتابتا ءوتتى. قازاقستان بۇعان دەيىن ۇلكەن جارىستار، الەم چەمپيوناتتارىن وتكىزگەن. دەگەنمەن، مۇنداي كولەمدەگى تۋرنيرلەردى ءبىز ءالى ۇيىمداستىرماعان ەدىك. ءبىز بارلىق ۇيىمداستىرۋ كومانداسى، قازاقستان شاحمات فەدەراتسياسى جانە حالىقارالىق شاحمات فەدەراتسياسىمەن بىرلەسىپ جوسپارلى ءارى ناتيجەلى جۇمىس اتقاردىق»، - دەدى دارمەن ءسادۋاقاسوۆ.
ونىڭ ايتۋىنشا، حالىقارالىق شاحمات فەدەراتسياسى (FIDE) چەمپيوناتتىڭ ۇيىمداستىرىلۋ دەڭگەيىن جوعارى باعالاعان.
«بۇل بىزگە بولاشاقتا بۇدان دا باسقا ءىرى حالىقارالىق جارىستاردى وتكىزۋگە مۇمكىندىك بەرەتىن الاڭ بولدى دەپ زور سەنىممەن ايتا الامىز»، - دەپ تۇيىندەدى شاحمات فەدەراتسياسىنىڭ ۆيتسە- پرەزيدەنتى.