الەمنىڭ 180 ەلىنىڭ مەملەكەتتىك تۋىن جاتقا بىلەتىن ەرگەن دۇيسەنبەك استانا قالاسىنداعى مەكتەپتەردىڭ ءبىرىنىڭ وقۋشىسى. 6 جاسار بالا وقۋ-اعارتۋ مينيسترلىگىندە بولىپ، ەلىمىزدىڭ باس ۇستازى عاني بەيسەمبايەۆپەن كەزدەستى. ەرگەن مينيسترگە ءوز تالابىن كورسەتىپ، وسى ەلدەردىڭ بارلىعىنا بارۋدى ارماندايتىنىن ايتتى.
«مەن الەمنىڭ بارلىق مەملەكەتىنىڭ تۋىن بىلەمىن، ءبىراق سونىڭ ىشىندەگى ەڭ ادەمىسى - ءبىزدىڭ ەلدىڭ تۋى. ەسەيگەندە اتاقتى ادام بولىپ، كوك بايراعىمىزدى بۇكىل الەمگە تانىتىپ، كوككە كوتەرگىم كەلەدى»، - دەدى 6 جاسار ەرگەن دۇيسەنبەك.
وقۋشىنىڭ اناسىنىڭ ايتۋىنشا، بالانىڭ تۋلارعا دەگەن قىزىعۋشىلىعى 2-3 جاسىندا پايدا بولعان جانە وسى جاستان ولاردى كوللەكتسيا ەتىپ جيناي باستاعان. بۇگىندە بالاقاي ەلتاڭبالارعا قىزىعۋشىلىق تانىتىپ ءجۇر. اتا-اناسىنان ءوز تۋعان كۇنىنە قازاقستاننىڭ ەلتاڭباسىن سىيلاۋدى دا وتىنگەن.
مينيستر عاني بەيسەمبايەۆ دارىندى جەتكىنشەكتى ءوزىنىڭ قىزمەتتىك كرەسلوسىنا وتىرعىزىپ، موينىنداعى گالستۋگىن دە شەشىپ، بالانىڭ موينىنا تاقتى. كەيىن قول جايىپ، باتاسىن بەردى.
«ۇلكەن جىگىت بولىپ وسۋىڭە جانە تەك اتا-اناڭا عانا ەمەس، بۇكىل ەلگە قامقور بولاتىن اقىلدى دا، باتىر ازامات بول»، - دەپ تىلەدى ۆەدومستۆو باسشىسى.