مينيستر بۇكىل الەمنىڭ تۋىن جاتقا بىلەتىن ءبۇلدىرشىن ەرگەندى ارنايى قابىلداپ، باتاسىن بەرگەن.
«ەرتەڭ ءبىلىم جۇيەسىن باسقاراتىن جىگىت بولسىن»، - دەيدى مينيستر.
عاني بەيسەمبايەۆ بۇلدىرشىنگە گالستۋگىن تاعىپ، سىيعا بەردى.
«مەن ەندى گالستۋكسىز قالدىم»، - دەپ ازىلدەدى مينيستر.
وقۋ-اعارتۋ مينيسترلىگى باسپا ءسوز قىزمەتىنىڭ مالىمەتىنشە، كەزدەسۋ كەشە، 18-قاڭتاردا وتكەن. كەزدەسۋگە ەرگەن ءوزىنىڭ تۋلار جيناعىن اكەلىپ، بىلىمدىلىگىن كورسەتكەن. سونداي-اق، ول وسى ەلدەردىڭ بارىنە بارۋدى ارماندايتىنىن ايتقان.
«مەن الەمنىڭ بارلىق مەملەكەتىنىڭ تۋىن بىلەمىن، ءبىراق سونىڭ ىشىندەگى ەڭ ادەمىسى - ءبىزدىڭ ەلدىڭ تۋى. مەن ەسەيگەندە اتاقتى ادام بولىپ، كوك بايراعىمىزدى بۇكىل الەمگە تانىتىپ، كوككە كوتەرگىم كەلەدى»، - دەدى 6 جاسار ەرگەن دۇيسەنبەك كەزدەسۋدە.
ەرگەننىڭ اناسىنىڭ ايتۋىنشا، بالانىڭ تۋلارعا دەگەن قىزىعۋشىلىعى 2-3 جاسىندا پايدا بولعان. ءدال وسى ساتتەن باستاپ ەرگەن الەم ەلدەرىنىڭ تۋلارىن جيناي باستاعان. ەندى بالاقاي ەلتاڭبالارعا قىزىعۋشىلىق تانىتىپ، تۋعان كۇنىنە اتا- اناسىنان وعان قازاقستاننىڭ ەلتاڭباسىن سىيلاۋدى وتىنگەن.
ايتا كەتەيىك، التى جاسار ەرگەن دۇيسەنبەك 180 ەلدىڭ تۋىن جاتقا بىلەدى. «استانا» تەلەارناسىنىڭ مالىمەتىنشە، ەستە ساقتاۋ قابىلەتى ەرەكشە بالدىرعان استانا قالاسىندا تۇرادى. اناسىنىڭ ايتۋىنشا، ءار مەملەكەتتىڭ تۋىن تانىپ، اتىن اتاۋ - ونىڭ سۇيىكتى ءىسى.
ەس بىلگەننەن قىزىعىپ، سۋرەتتەرىن جيناي باستاعان. ەرگەندە 200 گە جۋىق تۋدىڭ سۋرەتى بار. ءۇيدىڭ ىشىنە ەلىمىزدىڭ كوك بايراعىن ءىلىپ قويعان. ەرگەن مەملەكەتتەر تۋلارىن ەشكىمنىڭ كومەگىنسىز، ءوزى جاتتاعان.