«حابار 24» ارناسىنىڭ مالىمەتىنشە، ول ۇلتتىق تاعامدى وزىندىك ادىسپەن دايىندايدى. مەيرامحانا قازانىندا كۇنىنە 500-600 كەلى ەت اسىلادى. قازى- قارتا، جال-جاياسىمەن تاباق تارتىلادى.
كاسىپكەر باستى ينگرەديەنت ەت بولعاندىقتان، ونى كەز كەلگەن جەردەن الا بەرمەيتىنىن ايتتى. قىستا تەك قولدا باپتالعان جىلقى ەتىن پايدالانادى.
«قوناقتار وتىراتىن كيىز ءۇيدىڭ ۇزىندىعى 20 مەتر، ەنى 6 مەتر. 100 كىسى سيادى. ۇلكەن بانكەتتەر وتكىزەمىز. ەندى تاشكەنت قالاسىندا اشۋدى جوسپارلاپ وتىرمىن. قازاقتىڭ ۇلتتىق تاعامىن وزبەكستان ەلىنە تانىتقىم كەلەدى»، - دەدى ول.
مەيرامحاناعا ەلدىڭ تۇكپىر-تۇكپىرىنەن ارنايى، ءدام تاتۋعا كەلەتىندەر كوپ ەكەن.
«مۇندا ءجيى كەلىپ تۇرامىن. بلوگەر بولعاندىقتان ءتۇرلى ەلدىڭ اسحاناسىنان ءدام تاتقىم كەلەدى. قازاقتىڭ ۇلتتىق تاعامدارى ەرەكشە اسەر قالدىردى. قازاقى ءدامدى اڭساعان اعايىن ءۇشىن تاپتىرماس ورىن. قىس مەزگىلىندە كەلۋشىلەر كوپ. جاڭا پىسكەن ەت پەن سورپا كۇش بەرەدى ونىڭ قۇرامىندا ادامنىڭ اعزاسىنا قاجەتتى بارلىق دارۋمەن بارىن ەندى ءبىلدىم»، - دەيدى وزبەكستاندىق بلوگەر ابۋدحوجا مۇساحوجايەۆ.
ءابدىراسۋلدىڭ تاعى ءبىر اسقاق ارمانى بار. كاسىبىن قازاقستاندا جالعاستىرعىسى كەلەدى. ارىپتەس دوستارى ەلوردا تورىندە مەيرامحانا اشۋدى ۇسىنعان. ءبىر عانا الەۋمەتتىك جەلىدەگى پاراقشاسىندا 225 مىڭ وقىرمانى بار قازاق مەيرامحاناسى تاشكەنتتە وتە تانىمال.