بيىلدان باستاپ مەكتەپ فورماسى قالاي وزگەرەدى
2022-جىلعى 30- جەلتوقساندا وقۋ-اعارتۋ ءمينيسترى قول قويعان بۇيرىق 5-قاڭتاردان باستاپ كۇشىنە ەندى، دەپ حابارلايدى قازاقپارات ءتىلشىسى.
وڭىرلىك كوممۋنيكاتسيالار قىزمەتىنىڭ ونلاين بريفينگىندە الماتى قالالىق ءبىلىم باسقارماسىنىڭ رۋحاني-ادامگەرشىلىك تاربيە ءبولىمىنىڭ باسشىسى نۇرگۇل تاۋ قىزدار مەن ۇلدار ءۇشىن مەكتەپ فورماسىنا تۇيمە نەمەسە سىدىرماسى بار تريكوتاج كۇرتە (كارديگان)، پولو جەيدە نەمەسە تەننيسكا قوسىلعانىن مالىمدەدى.
ەر بالالارعا ارنالعان مەكتەپ فورماسى:
- پيدجاك، جيلەت، شالبار، مەرەكەلىك جەيدە، كۇندەلىكتى جەيدە، نە تۇيمەلەرى بار نەمەسە سىدىرمالى توقىلعان كۇرتە (كارديگان)، پولو جەيدە نەمەسە تەننيسكا (قىس مەزگىلىندە: تريكوتاج جيلەت، ۆودولازكا). ۇلدارعا ارنالعان شالبارلار ەركىن تىگىلگەن جانە ۇزىندىعى بويىنشا توبىقتى جاۋىپ تۇرادى.
قىز بالالارعا ارنالعان مەكتەپ فورماسى:
- پيدجاك، جيلەت، بەلدەمشە، شالبار، كلاسسيكالىق جەيدە، نە تۇيمەلەرى بار نەمەسە سىدىرمالى توقىلعان كۇرتە (كارديگان)، پولو جەيدە نەمەسە تەننيسكا (قىسقى ۋاقىتتا: تريكوتاج جيلەت، سارافان، ۆودولازكا). قىزدارعا ارنالعان شالبارلار ەركىن تىگىلگەن جانە ۇزىندىعى بويىنشا توبىقتى جاۋىپ تۇرادى.
مەرەكەلىك فورماعا (ۇلدارعا اق كويلەك، قىزدارعا اق بلۋزكا) قويىلاتىن تالاپ الىنىپ تاستالدى. سونداي-اق، گالستۋك تاعۋ ەندى مىندەتتى ەلەمەنت ەمەس.
نۇرگۇل تاۋدىڭ ايتۋىنشا، الماتىدا ءتۇسىندىرۋ جۇمىستارى باستالعان.
«بىزدە قازىر وقۋ جىلىنىڭ ورتاسى بولدى. جاڭا وقۋ جىلىنان باستاپ ءار مەكتەپتىڭ قامقورلىق كەڭەسى اتا-انالارمەن كەڭەسىپ، ولارعا قاجەتتى ستيلدى تاڭدايدى»، - دەدى ول.
بۇل رەتتە ول بالا قازىر پولو نەمەسە جيلەت كيگىسى كەلسە، وندا وعان قۇقىلى ەكەنىن ايتتى.
ول سونداي-اق بالا ءتيىستى مەكتەپ فورماسىن كيمەسە، كىمنىڭ جاۋاپتى بولاتىنىن جەتكىزدى.
«بۇعان سىنىپ جەتەكشىسى جاۋاپتى ەمەس، ءبىراق ول وقۋشىلارمەن، اتا-انالارمەن ءتۇسىندىرۋ جۇمىستارىن جۇرگىزىپ، وقۋشىنىڭ مەكتەپتەگى كيىم ۇلگىسىنە اتا-اناسى جاۋاپتى ەكەنىن جەتكىزۋى كەرەك. ەگەر بالا مەكتەپ فورماسىن كيمەسە، وندا ءبىلىم بەرۋ سالاسىنداعى ساپانى قامتاماسىز ەتۋ دەپارتامەنتىنە حات جولدانادى، وندا ءتيىستى جۇمىستار جۇرگىزىلەدى»، - دەدى ول.
الماتى قالاسى ءبىلىم باسقارماسىنىڭ اكىمشىلىك-قۇقىقتىق ءبولىم باسشىسىنىڭ مىندەتىن اتقارۋشى ءىلياس ورالبايەۆ يۋبكانىڭ ءتۇسى، ستيلى، ۇزىندىعىن ورتا ءبىلىم بەرۋ ۇيىمى جانە مەكتەپتىڭ اتا-انالار جينالىسىنىڭ حاتتاماسىمەن بەكىتىلگەن قوعامدىق كەڭەس بەلگىلەيتىنىن ايتتى.
جاڭا ەرەجەگە سايكەس، مەكتەپ فورماسىنا ورتا ءبىلىم بەرۋ ۇيىمىنىڭ ەرەكشەلىك بەلگىلەرى: ەمبلەما، تىگىسپە، شيەۆرون ورنالاستىرۋعا رۇقسات ەتىلەدى.
مەكتەپ فورماسىنا ارنالعان ماتالار - ساپاسى جاقسارتىلعان، تەز توزبايتىن، باكتەريا، ميكروبقا قارسى جانە انتيستاتيكالىق قاسيەتتەرى بار جارتىلاي ءجۇن جانە ماقتا ماتالار بولعانى ءجون. بۇرىن بۇل مىندەتتى تالاپ بولاتىن.
ەسكە سالساق، بۇعان دەيىن وقۋ-اعارتۋ مينيسترلىگى مەكتەپ فورماسىنا وزگەرىس ەنگىزەتىنىن حابارلاعانبىز.