قىسقى ۋنيۆەرسيادادا قازاقستان قورجىنىنا العاشقى التىن مەدال ءتۇستى
07:45, 15 - قاڭتار 2023
استانا. قازاقپارات - قازاقستاندىق بياتلونشى ۆاديم كۋرالەس لەيك-پلەسيد (ا ق ش) قالاسىندا ءوتىپ جاتقان قىسقى ۋنيۆەرسيادانىڭ چەمپيونى اتاندى، دەپ حابارلايدى قازاقپارات ءتىلشىسى.
ۆاديم كۋرالەس 15 شاقىرىم قاشىقتىقتا جەكەلەي سىندا مارە سىزىعىن ءبىرىنشى بولىپ قيدى.
جارىس جولىنا 16-ىنشى بولىپ شىققان ۆاديم نىسانا كوزدەۋدەن ءبىر عانا رەت (0+1+0+0) ءمۇلت كەتىپ، 42:37.4 مينۋت ناتيجە كورسەتتى.
نورۆەگيالىق بياتلونشى ەريان موسەنگ قازاقستاندىقتان 42,6 سەكۋندقا قالىپ قويىپ، ەكىنشى ورىنعا يە بولدى. فرانسيالىق اكسەل گارنە (+1:16.5) ۇزدىك ۇشتىكتى تۇيىندەدى.
قازاقستاندىقتاردان كەشە سونداي-اق الەكساندر مۋحين، كيريلل باۋەر جانە بەكەنتاي تۇرلىبەكوۆ وسى قاشىقتىقتا سىنعا تۇسكەنىمەن، ولار جۇلدەگە ىلىگە المادى.
وسىلايشا، قازاقستان قورجىنىنا العاشقى جۇلدە - التىن مەدال ءتۇستى.
ەسكە سالا كەتەيىك، بۇدان بۇرىن قىسقى ۋنيۆەرسيادادا مانەرلەپ سىرعاناۋدان قازاقستاندىق جۇپتىڭ 10-ورىن العانىن جازعان بولاتىنبىز.