بۇعان دەيىن Fatzorb كاپسۋلالارى وزبەكستاندا قاۋىپتى دەپ تانىلعان بولاتىن. بۇقارالىق اقپارات قۇرالدارى مالىمەتىنشە، ونىڭ قۇرامىندا كۇشتى اسەر ەتەتىن سيبۋترامين بار.
قازىرگە دەيىن بۇل بيولوگيالىق بەلسەندى قوسپانىڭ قازاقستاندا تىركەلگەنى بەلگىلى بولدى. الايدا مەملەكەتتىك تىركەۋ تۋرالى كۋالىكتىڭ ءبىرىڭعاي ءتىزىلىمىنىڭ دەرەكتەرىنە سايكەس، 2021 -جىلعى ماۋسىمنان باستاپ تىركەۋ كۇشى جويىلعان. الايدا ول قازنەتتە ەركىن ساتىلىپ جاتىر. ينتەرنەتتەن بۇل كاپسۋلانى ىزدەگەن كەزدە ول تۋرالى ونداعان حابارلاندىرۋ شىعادى.
جارناماعا سايكەس، Fatzorb كاپسۋلالارى «سالماقتان ارىلۋعا جانە مەتابوليزمدى جەدەلدەتۋگە» ارنالعان.
اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ اتشاباروۆ اتىنداعى ىرگەلى جانە قولدانبالى مەديتسينا عىلىمي- زەرتتەۋ ينستيتۋتىنىڭ ديرەكتورى تيمۋر ساليەۆتىڭ ايتۋىنشا، جانۋارلار مەن ادامدارعا جۇرگىزىلگەن سىناقتا كاپسۋلالار جاناما اسەرىن كورسەتكەن.
«Fatzorb قۇرامىندا قانىقتىق سەزىمىن ارتتىراتىن انورەكسيگەن سانالاتىن سيبۋترامين بار. سيبۋترامين سەمىزدىكتى ەمدەۋ ءۇشىن قولدانىلادى جانە ارتىق سالماعى بار ناۋقاستارعا كەشەندى قولداۋ تەراپياسىندا پايدالانىلادى. پرەپارات تابەتتى جانە تۇتىنىلاتىن تاعام مولشەرىن ازايتادى، دەنەنىڭ جىلۋ ءوندىرىسىن ارتتىرادى. ال جانۋارلارعا جۇرگىزىلگەن تاجىريبە ءسيبۋتراميننىڭ ەركەك ەگەۋقۇيرىقتاردا اتالىق بەزدىڭ قاتەرسىز ىسىگىنىڭ، ال قويانداردا فيزيكالىق دامۋدىڭ اۋىتقۋلارىنىڭ سەبەبى بولعانىن كورسەتتى»، - دەدى تيمۋر ساليەۆ.
ساراپشىنىڭ ايتۋىنشا، ادامعا جۇرگىزىلگەن زەرتتەۋ ناتيجەلەرى مۇنى ۇزاق ۋاقىت قولدانعاندا «گيپەرتونيالىق ناۋقاستاردا، سونداي-اق، ينفاركت پەن ينسۋلت العان ادامداردا ءبىرقاتار اۋىر جاناما اسەر تۋدىرۋى مۇمكىن» ەكەنىن كورسەتكەن.
«سوندىقتان بۇل پرەپاراتقا الەمنىڭ كوپتەگەن ەلىندە تىيىم سالىنعان. سونداي-اق، سيبۋترامين دۇنيەجۇزىلىك دوپينگكە قارسى اگەنتتىكتىڭ تىيىم سالىنعان دارىلەر تىزىمىنە ەنگىزىلگەن»، - دەدى ساليەۆ.
ماسساگەت