بۇل تۋرالى ءماجىلىس دەپۋتاتى امانجان جامالوۆ ايتتى، دەپ حابارلايدى قازاقپارات ءتىلشىسى.
ەلىمىزدە ايەلدەردىڭ زەينەتكە شىعۋ جاسى 2028-جىلعا دەيىن 61 جاس دەڭگەيىندە بەكىتىلگەنىنە توقتالعان دەپۋتات، الداعى جىلدارى ۇكىمەت زەينەتاقى جۇيەسىنە قاتىستى وڭتايلى شەشىم جاساۋى ءتيىس ەكەنىن ايتتى.
«ستاتيستيكا قاراساق، سوڭعى ءۇش جىلدا ايەلدەر اراسىندا ءومىر سۇرۋ ۇزاقتىعى 77 دەن 75,5 جاسقا دەيىن، ياعني 1,5 جىلعا ازايعان. سوندىقتان ەلىمىزدەگى ايەلدەر زەينەت جاسىنا ەرتە شىققانى دۇرىس بولار ەدى»، - دەدى ا. جامالوۆ ءماجىلىستىڭ جالپى وتىرىسىندا ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.
ونىڭ ايتۋىنشا كەڭەستىك كەزەڭدە ايەلدەر شامامەن 5-6 بالانى ومىرگە اكەلىپ، ءۇي جۇمىسىمەن قاتار، وندىرىستە دە ەڭبەك ەتەتىن.
«سوندىقتان زەينەتكە ەرتە شىعۋى ايەلدەر مەن انا ەڭبەگىن باعالاۋدىڭ ءادىل وتەماقىسى رەتىندە قارالاتىن. قازىرگى الەمدە ايەلدەردىڭ ەڭبەك جانە ءومىر ءسۇرۋ جاعدايلارى وزگەردى. ءبىز گەندەرلىك تەڭدىككە ۇمتىلىپ وتىرمىز، سونداي- اق جۇمىس جانە ءوندىرىس جاعدايلارى جاقسارىپ كەلەدى. ءۇي شارۋالارى جەڭىل جانە قاۋىپسىز بولىپ جاتىر. الايدا ءبىر فاكت وزگەرىسسىز قالدى. بۇل تۇرعىدا بالا تۋعان كەزدە ايەلدەر جۇمىستان ۋاقىتشا كەتىپ، كاسىبي مانسابى مەن تاجىريبەسى توقتاپ قالادى. ەلىمىزدەگى ءار ايەل ورتا ەسەپپەن ءۇش بالانى ومىرگە اكەلەدى. وسى كەزەڭدە ءتيىستى جارنا اۋدارىلماعاندىقتان، ولاردىڭ زەينەتاقىسى دا جوعارى بولمايدى. بۇل رەتتە ايەلدەردىڭ زەينەتكە ەرتە شىعۋى تۇرىندە جەڭىلدىك جاساۋىل كەرەك. دەگەنمەن مۇنداي قۇقىق زاماناۋي جاعدايلاردى ەسكەرە وتىرىپ، ءادىل تۇردە ۇسىنىلۋى كەرەك»، - دەدى دەپۋتات.
«قازىرگى كەزدە 53 جاستان 5 جانە ودان دا كوپ بالا تۋعان، ولاردى سەگىز جاسقا دەيىن تاربيەلەگەن كوپبالالى انالار عانا زەينەتكەرلىككە شىعادى. مەنىڭ ويىمشا، جوعارىدا اتالعاندى ەسكەرە وتىرىپ، ۇكىمەت بالاسى بار انالاردىڭ زەينەتكە شىعۋ جاسىن ازايتۋ ۇسىنىسىن قاراستىرۋى ءتيىس. ومىرگە كەلگەن ءار بالا ءۇشىن زەينەتكەرلىك جاستى ەكى جىلعا ازايتقان ءجون. الايدا 10 جىلدان اسپايتىن مەرزىمگە تومەندەتۋ كەرەك. وسى ورايدا ءۇش بالاسى بار ايەل زەينەتكە 6 جىل ەرتە شىعا الاتىن بولادى»، - دەدى امانجان جامالوۆ.