ويتكەنى پاتەر جاعالاعان جۇرت وزگە بىرەۋگە اي سايىن قىرۋار قارجى بەرۋگە ءماجبۇر. بۇعان كوممۋنالدى تولەم قوسىلادى. ونىڭ ۇستىنە ۇيگە رەسمي تۇردە بىرنەشە ادام تىركەلگەن بولسا، كوممۋنالدى تولەم دە تيىسىنشە قىمباتقا شىعادى. الايدا قازىر ءۇي الۋعا، باسپانالى بولۋعا ارنالعان باعدارلاما كوپ. سوندىقتان قازىر جاستاردىڭ كوپشىلىگى ءتۇرلى باعدارلامامەن ءۇيلى بولىپ جاتقانىن بايقاپ ءجۇرمىز.
Massaget.kz ءتىلشىسى ءارتۇرلى باعدارلاما ارقىلى ءۇي العاندارمەن سۇحباتتاستى.
«7 جىل ارماندادىم». «الماتى جاستارى» باعدارلاماسى
الماتى تۇرعىنى گۇلنۇر ايبەكوۆا 7 جىلدان بەرى ءۇي الۋدى ارمانداعان. ونىڭ ماماندىعى - جۋرناليست. گۇلنۇردىڭ ءۇي الۋ ارمانى بيىل «الماتى جاستارى» باعدارلاماسى ارقىلى ورىندالعان. بۇل باعدارلاماعا مۇعالىمدەر، عىلىمي قىزمەتكەرلەر، جۋرناليستەر سەكىلدى ماماندىق يەلەرى قاتىسا الادى. بيىل قازاندا «الماتى جاستارى» باعدارلاماسىنا قوسىمشا ىرىكتەۋ باستالدى. العاشىندا گۇلنۇردىڭ قۇجاتتارى دۇرىس بولماعانىمەن، قازاندا تاپسىرعان كەزدە ءبارى ءساتتى بولعان. وسىلايشا، ول قاراشادا ارمانىن جۇزەگە اسىرعان.
«الماتى قالاسى شالياپين ساين كوشەلەرى قيىلىسىنان ەكىنشى نارىقتاعى ءبىر بولمەلى ءۇي الدىق. باعاسى 19 ميلليون 500 مىڭ تەڭگە بولدى. بانك 18 ميلليون تەڭگە بەرەدى. ودان ارتىق بەرىلمەيدى. قالعانىن ءوزىمىز قوستىق. جىلدىق مولشەرى 5 پايىزبەن الدىق. العاشقى سالىم - 10 پايىز. ياعني 1 ميلليون 800 مىڭ تەڭگە تولەدىك»، - دەيدى ول.
«الماتى جاستارى» باعدارلاماسىمەن ءۇي الار كەزدە ەسكەرىلەتىن تاعى ءبىر جايت - تولەم قابىلەتىنىڭ بولۋى. ال اي سايىن قاجەت سومانى تولەي الماسا، تەڭ قارىز الۋشىعا جۇگىنە الادى.
تەڭ قارىز الۋشى - قارىز الۋشىمەن (نەمەسە دەبيتورمەن) كەلىسىمشارت بويىنشا بىرلەسىپ، جاۋاپكەرشىلىك الاتىن ادام.
«باسقا قالادان دا تەڭ قارىز الۋشىعا جۇگىنۋگە بولادى. بىزگە اقتوبەدەن تانىسىمىز تەڭ قارىز الۋشى رەتىندە كومەكتەستى. بانكتە تولەم قابىلەتتىلىگى جەتپەگەندىكتەن ەكى تەڭ قارىز الۋشىعا دەيىن جۇگىنۋگە بولاتىنى ايتىلدى. بىزدە بىرەۋ بولدى. ول ادام باسقا قالادان بولسا دا، سول جاقتا وتىرىپ قول قويۋدىڭ امالدارى بار ەكەن»، - دەيدى گۇلنۇر.
ول جەلتوقساندا ءۇي العان. باعدارلامانىڭ تاعى ءبىر ءتيىمدى تۇسى - اي سايىنعى تولەم ۋاقىتىن ءوزىڭ تاڭداي الۋىڭ. اقتوتى ۇيگە قانداي شارت قويىلاتىنىن جانە ايىنا قانشا تولەيتىنىن ايتتى.
«باعدارلامادان وتكەن سوڭ ءۇي تابۋعا 45 كۇن ۋاقىت بەرىلەدى. اقشاسى اسىپ كەتسە، ءوزى قوسادى. ءۇيدىڭ جىلى ماڭىزدى رول اتقارادى. ويتكەنى بانككە يپوتەكاعا وتەتىن جىلى ساي كەلۋى كەرەك. بىزدە 1972-جىلدان باستاپ ەسەپتەلەدى. جالپى ءۇيدىڭ سالىنعانىنا 50 جىلدان اسپاۋى كەرەك. قازىر ايىنا 140 مىڭ تەڭگەدەن تولەيمىن. بۇل سومانى 13 جىل بويى تولەيمىن. بۇرىن قالادان پاتەردى 250 مىڭ تەڭگەگە جالداپ ءجۇردىم. ەندى ول اقشانى ءوز ۇيىمە سالامىن»، - دەيدى ول.
ايتا كەتەيىك، «الماتى جاستارى» - جىلىنا ءبىر رەت بولاتىن يپوتەكالىق باعدارلاما. ول ارقىلى 35 جاسقا دەيىنگى جاستارعا باسپانا الۋعا مۇمكىندىك بەرىلەدى.
ەكى جىلدىڭ ىشىندە الماتىدان پاتەر قالاي ساتىپ الدىم؟ مەنىڭ اڭگىمەم
«اقشانى تويعا، قىدىرۋعا قۇرتىپ ءجۇردىم». «7-20-25» باعدارلاماسى
بيىل پرەزيدەنت تاپسىرماسىمەن «7-20-25» يپوتەكالىق تۇرعىن ءۇي باعدارلاماسى جالعاسادى. باعدارلاما بويىنشا 100 ميلليارد تەڭگەگە دەيىن قاراجات ءبولۋ جوسپارلانعان. بۇل باعدارلاما بويىنشا «العاشقى» باسپاناعا، ياعني تەك جاڭا باسپانانى ساتىپ الۋعا بولادى. باستاپقى جارنا - باسپانا قۇنىنىڭ 20 پايىزى، ال شەكتىك مەرزىم - 20 جىل.
وسى باعدارلامامەن الماتى تۇرعىنى دا (اتى-ءجونىن اتاماۋدى ءوتىندى) قايرات شاعىناۋدانىنان پاتەر العان. ونىڭ سوزىنشە، اقشا جيناۋىنا پاندەميا كەزى سەبەپ بولعان.
«2020-جىلى پاندەميا كەزىندە پاتەر جالداپ تۇرىپ ءجۇردىم. ۇزاق ۋاقىت پاتەردە ءجۇردىم. وعان دەيىن دە «وتباسى بانكتە» شوتىم بولدى. اراسىندا اقشا سالىپ ءجۇردىم. ءبىراق جيناماعان كەزدەرىم دە بولدى. وندا جىلىنا سىياقى تۇسەدى. الايدا وعان تالپىنىپ، ادەيلەپ جيناپ، اقشانى كوبەيتكەن جوقپىن. تەك ارا-اراسىندا سالىپ ءجۇردىم. شىنىن ايتقاندا، اقشانى ساياحاتقا، قىدىرىسقا، قازاقپىز عوي، تويعا، قۋانىشتارعا جۇمساپ ءجۇردىم. اقشا جينامادىم. 2020-جىلى جاڭا جىلدان كەيىن «وتباسى بانكىنەن» سىياقى ءتۇستى. كەيىن پاندەميا كەزىندە ۇيدە وتىرىپ قالعانىمىز بار. ءبىراز اقشامدى جيناپ الدىم. سول كەزدە پاتەر يەسى دە حابارلاسىپ، پاتەرىن جوندەيتىنىن، ەندى ۇلى تۇراتىنىن ايتتى. سول دا تۇرتكى بولدى. وسىلايشا، شوتتاعى اقشانى كوبەيتىپ، 2022-جىلى 7-20-25 باعدارلاماسىمەن ءۇيدى راسىمدەدىم»، - دەيدى ول.
قالا تۇرعىنى پاتەرىن قانشاعا العانىن جانە قانداي قيىندىقتار كەزدەسكەنىن ايتىپ بەردى.
«ءۇيدىڭ باعاسى 25 ميلليون بولدى. 2 بولمەلى پاتەر. العاشقى سالىمعا اقشام جەتتى. 5 ميلليون تەڭگە سالدىم. بۇل باعدارلاما بويىنشا سالىنعان، بىتكەن ءۇيدى تاڭداۋ كەرەك. كوپ جاعدايدا سالىنىپ تۇرعان ۇيلەر ءبىتىپ كەتكەن بولدى، بارلارى ۇنامادى. كەيىن ۇناعان ءۇيدى تاپتىم. 2021-جىلعى كۇزدە 20 پايىزىن سالىپ قويعانمىن. ءبىراق ءۇي ءالى بىتپەگەندىكتەن الدىن-الا كەلىسىمشارتقا وتىردىق. العاشىندا جەلتوقساندا بەرىلەتىنىن ايتتى. الايدا سالىنىپ بىتپەۋىنە بايلانىستى 2022-جىلى اقپاندا عانا راسىمدەدىم. بۇل باعدارلاما ماعان ءتيىمدى بولدى. بۇرىن اباي-بايتۇرسىنوۆ قيىلىسىنان 150 مىڭعا پاتەر جالداپ تۇردىق. بۇل باعا بىلتىر قاتتى كوتەرىلىپ، 450 مىڭعا دەيىن جەتىپتى. سوندا قانشاما اقشا بىرەۋدىڭ قالتاسىنا كەتەر ەدى؟ سوندىقتان ءتيىمدى بولدى»، - دەيدى ول.
قازاقستاندا «7-20-25» يپوتەكاسى جالعاسا ما؟
«باسقا بىرەۋدىڭ قالتاسىنا قۇيمايمىن». 50/50 باعدارلاماسى
تۇرعىن ءۇي الۋعا ارنالعان باعدارلامانىڭ ءبىرى - 50/50. بۇل باعدارلاما كوپ بانكتە بار. وتباسى بانكىندە پاتەر اقىسىنىڭ جارتىسىن جيناپ، ەڭ تومەنگى 5 پايىزبەن تابىسىن راستاماي، يپوتەكا الۋعا بولادى. ءبىراق «وتباسى بانكىندە» مىندەتتى تۇردە دەپوزيت بولۋى شارت.
اقتوبە تۇرعىنى اسەل بالاعاز دا وسى باعدارلاما ارقىلى باسپانالى بولعان. نەبارى 23 جاستاعى قىزدىڭ ءوز ءۇيى بار.
«7/5 مولشەرلەمەن الدىم. ايىنا 90 مىڭنان تولەيمىن. باعاسى نەگىزى 13 ميلليون تەڭگە بولدى. ءوز پاتەرىمە بار بولعانى 90 مىڭ تەڭگە تولەۋ كەرەمەت دەپ ويلايمىن. ارتىق اقشام وزىمدە قالادى، باسقا بىرەۋدىڭ قالتاسىنا قۇيمايمىن، بوسقا شىعىندانبايمىن»، - دەدى ول.
وسكەمەن تۇرعىنى ديانا ءجۇنىسوۆا دا وسى باعدارلامامەن ءۇي العان.
«50 پايىز باستاپقى جارنامەن الدىم. 50 پايىز «وتباسى بانكىنەن» بەرىلدى. 2 بولمەلى پاتەر الدىم. ايىنا 110 مىڭ تەڭگەدەن تولەيمىن. نەگىزى پاتەر قۇنى 20 ميلليون بولدى. جاس بولسام دا ءوز باسپانام بارىنا قۋانامىن. بۇل - ۇلكەن مۇمكىندىك»، - دەدى ول.
دەمەك، ەلىمىزدىڭ تۇكپىر-تۇكپىرىندە ءتۇرلى باعدارلامامەن پاتەر العاندار بارىن كورە الامىز. سوندىقتان مۇمكىندىكتى جىبەرمەۋ كەرەك.
ايتا كەتەيىك، بيىل ءۇي الۋدى جوسپارلاساڭىز، 2023-جىلى قانداي باعدارلامالارمەن باسپانا الۋعا بولاتىنىن مىنا جاقتان تابا الاسىز.