اتىراۋ مۇناي وڭدەۋ زاۋىتىندا قوندىرعى ءماجبۇرلى تۇردە توقتاتىلدى
زاۋىتتىڭ قوعاممەن بايلانىس بولىمىنەن ءمالىم ەتكەندەي، «سۇيىتىلعان مۇناي گازىن ساقتاۋ پاركى» ج ش س قويماسىندا سۇيىتىلعان گاز ساقتايتىن بوس ورىن قالماعان.
«ايماقتارداعى گازجەلىلىك مەكەمەلەردىڭ سۇيىتىلعان كومىرسۋتەك گازىن دەر كەزىندە تاسىپ شىعارماۋىنا بايلانىستى بيىلعى 10-قاڭتاردا ءاموز كاتاليتيكالىق كرەكينگ قوندىرعىسىنىڭ جانە وعان قاتىستى تەحنولوگيالىق نىسانداردىڭ جۇمىسىن ءماجبۇرلى تۇردە توقتاتتى. ءبىرقاتار تەحنولوگيالىق قوندىرعىلاردىڭ توقتاۋى ناتيجەسىندە «اتىراۋ ءموز» ج ش س كەلەسىدەگىدەي مۇناي ونىمدەرىن شىعارۋ كولەمىن ازايتتى. ماسەلەن، سۇيىتىلعىن كومىرسۋتەكتى گاز تاۋلىگىنە 500 توننادان 20 تونناعا دەيىن، اۆتوبەنزيندەر تاۋلىگىنە 6000 توننادان 1 500 تونناعا دەيىن، ديزەلدى وتىن تاۋلىگىنە 4000 توننادان 2000 تونناعا دەيىن. جوعارىدا ايتىلعانداردىڭ نەگىزىندە بەكىتىلگەن وندىرىستىك جوسپاردان اۋىتقىماۋ ماقساتىندا «ا م و ز» ج ش س باسشىلىعى باتىس قازاقستان، اقتوبە، قىزىلوردا جانە قوستاناي وبلىستارىنىڭ اكىمدىكتەرىن ەنەرگەتيكا مينيسترلىگىنىڭ ءبولۋ جوسپارىنا سايكەس «سۇيىتىلعان مۇناي گازىن ساقتاۋ پاركى» ج ش س- نەن سۇيىتىلعان كومىرسۋتەك گازىن تاسىپ شىعارۋ جۇمىستارىن ۇيىمداستىرۋدى سۇرايدى»، - دەپ حابارلادى زاۋىتتىڭ قوعاممەن بايلانىس ءبولىمىن.
ەنەرگەتيكا مينيسترلىگىنىڭ كەستەسىنە سايكەس اقتوبە وبلىسىنا 464 توننا، قىزىلورداعا - 1977 توننا، قوستانايعا - 3683 توننا، باتىس قازاقستان وبلىسى ءۇشىن 3589 توننا سۇيىتىلعان گاز بولىنگەن.
ەسكە سالا كەتەلىك، بۇدان بۇرىن اتىراۋ مۇناي وڭدەۋ زاۋىتىندا جوندەۋدەن سوڭ تاۋلىگىنە 400 تونناعا دەيىن گاز وندىرىلەتىنىن حابارلاعان ەدىك.