قىتاي بانكتەرى الەم بويىنشا ءبىرىنشى ورىنعا شىقتى

استانا. قازاقپارات - قىتاي بانكتەرى الەم بويىنشا ءبىرىنشى ورىنعا شىقتى، دەپ حابارلايدى.

وتكەن جىلى الەمدىك قارجى نارىعىندا قىتاي باتىستىق باسەكەلەستەرىن ورتا جولدا قالدىرىپ، ءبىرىنشى ورىنعا كوتەرىلگەن. بۇل جايىندا islam.kz پورتالى lenta.ru اقپارات كوزىنە سىلتەمە جاساي وتىرىپ مالىمدەدى.

قىتاي IPO-نىڭ (قور بيرجالارىندا باستاپقى ورنالاستىرۋ) جاڭا ورتالىعىنا اينالدى. قارجىگەرلەردىڭ پىكىرىنشە، ۇلتتىق زاڭنامانىڭ ەرەكشەلىكتەرى جانە الەمدەگى گەوساياسي جاعداي جەرگىلىكتى بانكتەرگە رەكوردتىق تابىس اكەلىپ، باتىستىق باسەكەلەستەردى رەيتينگتەردىڭ ءبىرىنشى ساتىسىنان ىعىستىرىپ شىعارۋعا مۇمكىندىك بەرگەن.

ال ءۇندىستان 2022 -جىلى الەمدەگى ەڭ ءىرى قارجى ينستيتۋتتارىن قابىلداۋدا جەتىستىككە جەتكەن. راس، بۇل ەلدە IPO-عا ەمەس، بىرىگۋ مەن قوسىلۋعا باسا نازار اۋدارىلدى. سوعان قاراماستان ساراپشىلار ءىرى اقشا جانە رەكوردتىق ينۆەستيتسيالار الەمىندە تەكتونيكالىق اۋىسۋدىڭ ورىن العانىن جوققا شىعارمايدى.

1979 -جىلى مەملەكەتتى باسقارعان رەفورماتور دەن سياوپيننىڭ(دىڭ شياۋپيڭنىڭ – رەد.) باستاماسىمەن قۇرىلعان CITIC ينۆەستيسيالىق مەملەكەتتىك كورپوراتسياسىنىڭ ەنشىلەس ۇيىمى بولىپ تابىلاتىن ءىرى قىتايلىق CITIC Securities ينۆەستيسيالىق بانكى 2022 -جىلى الەمدىك نارىقتا كوشباسشى بولدى.

CITIC Securities قارجى ۇيىمى جالپى سوماسى 18,6 ميلليارد دوللار بولاتىن مامىلەلەر بويىنشا اندەررايتەر (اندەررايتەردىڭ فۋنكتسيالارى قور بيرجاسىندا باعالى قاعازدار شىعارىلىمىن ورنالاستىرۋدى ۇيىمداستىرۋمەن شەكتەلەدى) رەتىندە ارەكەت ەتكەن. ەكىنشى ورىن دا قىتاي بانكىنە تيەسىلى - China International Capital Corp. (Central Huijin Investment ۇلتتىق قورىنا تيەسىلى) 10,4 ميلليارد دوللار تابىس تاپقان. باتىستىڭ ءىرى ويىنشىسى اتانعان امەريكالىق Citigroup تەك ءۇشىنشى ورىنعا تابان تىرەگەن. ونداعان جىلدار بويى IPO-نىڭ الەمدىك ورتالىعى - امەريكا قۇراما شتاتتارى بولىپ كەلگەن ەدى.