زەينەتاقى مەن جالاقى الداعى ۋاقىتتا دا يندەكساتسيالانادى - التاي كولگىنوۆ
بۇل تۋرالى پرەمەر-ءمينيستردىڭ ورىنباسارى التاي كولگىنوۆ ايتتى، دەپ حابارلايدى قازاقپارات ءتىلشىسى.
«وتكەن جىلى زەينەتاقى يندەكساتسيالاندى. قازىر ادامدار «10-15 مىڭ تەڭگە قوسىمشا تولەنە باستاعانىن، ال ينفلياتسيا ودان جوعارى ەكەندىگىن» جازىپ جاتىر. كوپتەگەن ادام ريزا ەمەس. بۇعان قانداي پىكىر بىلدىرەسىز؟ ادامدار يندەكساتسيانىڭ قايتا جۇرگىزىلەتىندىگىنە ۇمىتتەنە الا ما؟» - دەپ سۇراعان ەدى ب ا ق وكىلدەرى التاي كولگىنوۆتەن عىلىم جانە جوعارى ءبىلىم مينيسترلىگىنىڭ كەڭەيتىلگەن القا ماجىلىسىنەن كەيىن.
«جالپى، رەفورمالاردىڭ بارلىعى حالىقتىڭ تابىسىن ارتتىرۋعا باعىتتالعان. ءسىز ايتىپ وتىرعانداي، زەينەتاقى كوتەرىلدى. بيىل ينفلياتسيا دا رەكوردتىق كورسەتكىشكە جەتتى. مۇنى ەشكىم جاۋىپ-جاسىرىپ وتىرعان جوق. سوندىقتان، كەلەشەكتە دە يندەكساتسيا جۇرگىزىلەدى»، - دەپ جاۋاپ بەردى ۆيتسە-پرەمەر.
ونىڭ ناقتىلاي تۇسۋىنشە، بيىلعا شەشىم قابىلدانىپ قويدى. دەگەنمەن، كەلەشەكتە يندەكساتسيا جاسالادى.
«ارينە، كەلەشەكتە جالاقىعا قاتىستى دا يندەكساتسيا بولادى. وزدەرىڭىز دە دارىگەرلەردىڭ جالاقىسىنىڭ كوتەرىلگەنىن بىلەسىزدەر. بيىل مۇعالىمدەردىڭ جالاقىسى 25 پايىزعا، مەديتسينا قىزمەتكەرلەرىنىڭ ايلىعى 30 پايىزعا ارتتى. بارلىق سالادا، ونىڭ ىشىندە جەكە كومپانيالاردا جالاقى كوتەرىلىپ جاتىر. كاسىپوداقتار، جۇمىس بەرۋشىلەر جانە جەرگىلىكتى اتقارۋشى ورگاندار اراسىندا ءۇشجاقتى كەلىسىمشارت بار. بۇل تۇراقتى جۇمىس جانە ۇنەمى جۇرگىزىلىپ وتىرادى»، - دەدى التاي كولگىنوۆ.