قازاقستان عىلىمى ازاماتتاردىڭ ءومىر ساپاسىن ارتتىرۋعا سونشالىقتى ۇلەس قوسا الماي كەلەدى

استانا. قازاقپارات - جوعارى ءبىلىم مەن عىلىمدى دامىتۋدا ءبىرتۇتاس سالاارالىق ساياساتتى قالىپتاستىرۋ قاجەت.

بۇل تۋرالى ق ر پرەمەر-ءمينيسترىنىڭ ورىنباسارى التاي كولگىنوۆ ايتتى، دەپ حابارلايدى قازاقپارات ءتىلشىسى.

«جوعارى ءبىلىم، عىلىم سالالارىنىڭ قوعام مەن ەل ەكونوميكاسى دامۋىندا الاتىن ورنى ەرەكشە. بۇگىندە الەم ەكونوميكاسىن العا جەتەلەپ وتىرعان نەگىزگى رەسۋرستاردىڭ ءبىرى - ينتەلەكتۋالدىق كاپيتال. ەگەر وسىنى ەسكەرسەك، عىلىمي تەحنولوگيالىق دامۋ سالاسىندا قوعام بىزدەن ناقتى وزگەرىستەردى كۇتۋدە. سوندىقتان مينيسترلىكتىڭ باستى مىندەتى - وتاندىق عىلىمي-تەحنولوگيالىق يننوۆاتسيالىق جەتىستىكتەردىڭ ەكونوميكاعا ۇلەسىن ارتتىرۋ، جوعارى ءبىلىمنىڭ ەڭبەك نارىعىنىڭ جاڭا تالپاپتارىنا ساي ماماندار ازىرلەۋىن قامتاماسىز ەتۋ. جوعارى ءبىلىم مەن عىلىمدى دامىتۋدا ءبىرتۇتاس سالاارالىق ساياساتى قالىپتاستىرۋ قاجەت. وسىعان بايلانىستى مينيسترلىكتىڭ الدىندا ءبىرقاتار مىندەتتەر تۇر»، - دەدى ۆيتسە-پرەمەر ق ر عىلىم جانە جوعارى ءبىلىم مينيسترلىگىنىڭ كەڭەيتىلگەن القا ماجىلىسىندە.

ونىڭ اتاپ وتۋىنشە، ءبىرىنشى كەزەكتە مەملەكەت باسشىسى قاسىم-جومارت توقايەۆتىڭ قازاقستان حالقىنا جولداۋىندا، ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىن ورىنداۋعا، سونداي-اق پرەزيدەنتتىڭ سايلاۋالدى باعدارلاماسىن ىسكە اسىرۋعا باسا نازار اۋدارۋىمىز قاجەت.

«الدىمەن عىلىم سالاسىنىڭ ماسەلەلەرىنە توقتالساق، رەسپۋبليكالىق بيۋجەتتەن عىلىمدى قارجىلاندىرۋ 2019-جىلمەن سالىستىرعاندا 2 ەسەگە ارتتى. 2019-جىلى 40 ميلليارد تەڭگە بولسا، وتكەن جىلدىڭ قورىتىندىسىندا 80 ميلليارد تەڭگەدەن استى. بۇل - ۇلكەن قولداۋ. دەگەنمەن، وتاندىق عىلىم كوپتەگەن دامىعان ەلدەردەگىدەي ەكونوميكانىڭ دامۋىنا جانە ازاماتتاردىڭ ءومىر ساپاسىن ارتتىرۋعا ءبىز كۇتكەندەي ايتارلىق ۇلەس قوسا الماي كەلەدى. ءبىزدىڭ ەكونوميكامىزعا وتاندىق عىلىمي جەتىستىكتەردىڭ ناتيجەسىندە ازىرلەنگەن جوعارى تەحنولوگيالىق ءونىم شىعاراتىن ءوندىرىس كولەمى ءالى دە جەتكىلىسىز. سوندىقتان عىلىمي-تەحنولوگيالىق سالاداعى عىلىمي جاڭالىقتاردى ەكونوميكاعا ەنگىزۋگە بايلانىستى كەشەندى جۇمىستار جۇرگىزۋىمىز قاجەت»، - دەدى التاي كولگىنوۆ.