بۇل تۋرالى ءماجىلىستىڭ جالپى وتىرىسىندا «امانات» قوعامدىق كوميسسياسىنىڭ ءتوراعاسى ابزال قۇسپان ايتتى، دەپ حابارلايدى قازاقپارات ءتىلشىسى.
«وڭىردەگى كەيبىر قۇقىق قورعاۋ ورگاندارىنىڭ باسشىلارىنىڭ پرەزيدەنتتىڭ قاڭتار وقيعاسىن وبەكتيۆتى تۇردە تەرگەۋ تۋرالى تاپسىرماسىن ورىنداماۋ، ءتىپتى ساباتاج جاساۋ فاكتىلەرىن اشكەرەلەدىك. ورتالىق جانە وڭىرلىك مەملەكەتتىك ورگاندار مەن قۇقىق قورعاۋ ورگاندارىمەن بايلانىس ورناتىپ، بىرلەسە قىزمەت اتقاردىق. ولارعا ءوز ۇسىنىستارىمىزدى ۇدايى بەرىپ وتىردىق. قاڭتار وقيعاسى كەزىندە ارانداتۋشىلاردىڭ جەتەگىمەن قىلمىستىق ارەكەتتەرگە بارعان ازاماتتارىمىزعا راقىمشىلىق قولدانۋ تۋرالى پرەزيدەنتكە ۇسىنىس بەردىك. وسى زاڭنىڭ قابىلدانۋىنا مۇرىندىق بولدىق. قازىرگى تاڭدا وسى زاڭنىڭ ورىندالۋىنا دا اتسالىسۋدامىز. راقىمشىلىق زاڭىنىڭ ارقاسىندا قىلمىسقا تارتىلعان مىڭداعان ادامنىڭ باسىم بولىگى جاۋاپكەرشىلىكتەن بوساتىلدى نەمەسە جەڭىلدىكتەرگە يە بولادى. جالپى، ناقتى ءبىر وقيعاعا بايلانىستى، ءبىزدىڭ جاعدايدا قاڭتار وقيعاسىنا قاتىستى بىررەتتىك راقىمشىلىق العاش رەت قولدانىلعانىن اتاپ وتكىم كەلەدى»، - دەدى ابزال قۇسپان.
ادۆوكاتتىڭ ايتۋىنشا، قاڭتار وقيعاسىندا 238 ادام مەرت بولسا، ونىڭ 148 ى - الماتى قالاسىنىڭ تۇرعىندارى. وسىعان بايلانىستى كوميسسيا الماتى قالالىق پروكۋراتۋراسىمەن بىرگە قىلمىستىق ىستەردىڭ ءادىل تەرگەلۋى، قازا تاپقان ازاماتتارعا قاتىستى زاڭدى پروتسەستىك شەشىم قابىلدانۋى، ولاردىڭ وتباسىلارىنا ماتەريالدىق- الەۋمەتتىك، ءتىپتى پسيحولوگيالىق كومەك ۇيىمداستىرۋ باعىتىندا جۇمىس اتقاردى.
«الماتى قالاسىندا قازا تاپقان ازاماتتاردىڭ تۋىستارىنا ماتەريالدىق-الەۋمەتتىك كومەك كورسەتۋ ماسەلەلەرى نەگىزىنەن قالالىق پروكۋراتۋرانىڭ ۇيىمداستىرۋىمەن مەملەكەتتى ورگاندار تاراپىنان ءىشىنارا شەشىمىن تاپقانىن دا باسا ايتقىم كەلەدى. اتاپ ايتقاندا، ولاردىڭ كرەديتتەرى قارجىلىق مونيتورينگ اگەنتتىگىنىڭ ارالاسۋىمەن بانكتەر تاراپىنان كەشىرىلىپ، بالالارىن بالاباقشاعا ورنالاستىرۋ، مەكتەپكە دايىنداۋ، قاجەتتى مەديتسينالىق كومەك ۇيىمداستىرۋ، ءتىپتى پاتەراقىلارىن تولەۋ سياقتى تۇرمىستىق ماسەلەلەر قامتىلدى. وكىنىشكە وراي، كوميسسيا ءوز قىزمەتى بارىسىندا كەيبىر اتتەگەن-اي دەگىزەتىن جاعدايلاردىڭ دا كۋاسى بولدى. اتاپ ايتقاندا، الاڭدا قازا تاپقان ازاماتتارىمىزدىڭ ارتىندا قالعان كوپتەگەن جاس وتباسى پاتەراقى مەن ازىق-تۇلىك باعاسىنىڭ كۇرت قىمباتتاۋى سالدارىنان قيىن ماتەريالدىق جاعدايعا تاپ بولعان ەدى. وسىعان بايلانىستى كوميسسيادان ماتەريالدىق كومەك سۇراپ كەلۋشىلەر سانى دا از بولعان جوق. سول سەبەپتى كوميسسيا ەلىمىزدىڭ مۇناي-گاز سالاسىنداعى ءىرى كومپانيالارىنا حات جولداپ، وندا كوميسسيا ارقىلى نەمەسە تىكەلەي مۇقتاج جاندارعا كومەك بەرۋ تۋرالى ءوتىنىشىمىزدى بىلدىرگەن بولاتىنبىز. وكىنىشتىسى سول، بىردە- ءبىر كومپانيا ءوز كەلىسىمىن بەرمەدى. ءتىپتى، «قازاقستان حالقىن قولداۋ قورى» دا قاڭتار وقيعاسى بويىنشا تەك مەملەكەتتىك ورگاندارمەن جۇمىس جاسايتىنىن ىڭعاي تانىتتى. ياعني، بۇدان شىعاتىن قورىتىندى، پرەزيدەنتتىڭ «كاسىپكەرلەردىڭ تومەن الەۋمەتتىك جاۋاپكەرشىلىگى تۋرالى» ايتقان سىنىنىڭ قانشالىقتى ورىندى ەكەنىن بايقاۋعا بولادى»، - دەدى ول.