«ءسوزىڭىزدىڭ باسىندا بۇگىن قولىمىزدا تولىق مالىمەتتەر بار دەدىڭىز. قاڭتار وقيعاسى كەزىندە مەملەكەتتىك توڭكەرىس ارەكەتى جاسالدى ما، جوق پا؟ ەگەر مەملەكەتتىك توڭكەرىس ارەكەتى جاسالعان بولسا، ونى ۇيىمداستىرۋشىلار كىم؟»، - دەپ سۇرادى ءماجىلىس دەپۋتاتى ساۋىتبەك ءابدىراحمانوۆ باس پروكۋروردان.
بەرىك اسىلوۆ قاڭتار وقيعاسى كەزىندە مەملەكەتتىك توڭكەرىس ارەكەتى بولعانىن راستادى.
«مەملەكەت توڭكەرىسى بويىنشا، بۇل وتە كۇردەلى، وڭاي ەمەس سۇراق. مۇنىڭ ءبارىن تەرگەۋ كەزىندە ابدەن زەردەلەدىك. ارينە، مەملەكەت توڭكەرىسىن جاساۋعا وقتالۋ بولدى. ونى تەرگەۋ تولىعىمەن كورسەتتى. قازىرگى كەزدە بۇكىل قۇجاتتاردىڭ ءبارىن تەكسەرىپ، قاراستىرىپ جاتىرمىز. توڭكەرىسكە وقتالۋ الدىن الا دايىندالىپ، جوسپارلانعان. باياندامامدا ايتىپ كەتكەندەي، ءبىر جىل بۇرىن دايىندالۋ كەزەڭدەرى بولعان.
اتاپ ايتقاندا، بۇلاردىڭ ىشىندە ۇيىمداسقان قىلمىستىق توپتاردىڭ مۇشەلەرى دە بولعان. ءدىني ەكسترەميستەر دە بولدى، بۇرىن سوتتى بولعان ادامدار دا، «د ۆ ك» جاقتاۋشىلارى دا بولعان. ولاردىڭ ارەكەتتەرىنەن، جاڭا ايتىپ وتكەنىمدەي، 8 قالادا 71 عيمارات ورتەنىپ، بۇزىلعان. ول قىلمىستىڭ ءبارى ۇيىمداستىرۋشىلاردىڭ سەبەپكەرلىگىمەن بولىپ وتىر»، - دەدى ول.
سونداي-اق، باس پروكۋرور ءماسىموۆتىڭ ءىسى سوتتا دا قۇپيا تارتىپتە قارالىپ جاتقانىن ەسكە سالدى.
«ال ۇيىمداستۋرشىلارعا كەلسەك، باياندامامدا وزدەرىڭىزگە ايتتىم. بىرىنشىدەن، مەملەكەتكە وپاسىزدىق جاساۋ مەن بيلىكتى باسىپ الۋعا وقتالۋ بويىنشا ۇلتتىق قاۋىپسىزدىك كوميتەتىنىڭ بۇرىنعى ءتوراعاسى مەن ونىڭ ورىنباسارلارىنا قاتىستى قىلمىستىق ءىس قوزعالعان. ول قازىرگى كەزدە سوتقا جولداندى. ءىس، ارينە، جابىق جانە اسا قۇپيا تارتىپتە سوتتا قارالۋدا.
ەكىنشىدەن، وسىعان قوسا، بۇگىن جاپپاي تارتىپسىزدىكتىڭ 18 ۇيىمداستىرۋشىسى انىقتالدى. جاڭا عانا ايتىپ وتكەندەي، قىزىلوردا دا، الماتىدا دا، جامبىل وبلىسىندا دا سول ۇيىمداستىرۋشىلار ارقىلى كوپتەگەن مەكەمەلەر بۇزىلىپ، كوپتەگەن قىلمىستار جاسالدى. ونىڭ ىشىندە، اسىرەسە، جۇماگەلديەۆتىڭ ايرىقشا ءرولى بولدى. ودان باسقا ءدىني-ەكسترەميستىك ۇيىمداردىڭ ەكى مۇشەسى نۇرپەيىس پەن تىلەۋجانوۆ الماتى اۋەجايىن باسىپ تا العان. باسقا مەملەكەتتىك ورگانداردىڭ 71 عيماراتى تالقاندالدى. وسىنىڭ بارىنە نۇسقاۋ بەرىپ وتىرعان، ارينە، جاڭاعى باسشىلار دەپ سىزدەرگە تولىق ايتا الامىن»، - دەدى بەرىك اسىلوۆ.