بۇل تۋرالى ءماجىلىستىڭ جالپى وتىرىسىندا ق ر ىشكى ىستەر ءمينيسترى مارات احمەتجانوۆ ايتتى، دەپ حابارلايدى قازاقپارات ءتىلشىسى.
«2020 -جىلى «بەيبىت جينالىستار تۋرالى» جاڭا زاڭ كۇشىنە ەندى. ميتينگ ۇيىمداستىرۋ پروتسەسى «رۇقسات بەرۋ» جۇيەسىنەن «حابارلاما» قاعيداتىنا كوشتى. قازىر قارىم-قاتىناس تەك اكسيا ۇيىمداستىرۋشى جانە جەرگىلىكتى اتقارۋشى ورگان اراسىندا ورىن الادى. ميتينگكە قاتىسۋشىلار تاراپىنان قوعامدىق ءتارتىپتى ساقتاۋ مىندەتى ۇيىمداستىرۋشىعا جۇكتەلگەن. وسىعان وراي، پوليتسيانىڭ قوعامدىق ءتارتىپتى قامتاماسىز ەتۋ ادىستەرى وزگەردى. قارۋ مەن ارنايى قۇرالداردى وزدەرىمەن بىرگە الىپ شىقپايدى. قىزمەتكەرلەر ميتينگ وتەتىن اۋماققا جاقىن جەردە ورنالاسادى. جينالعاندارمەن تىكەلەي قارىم- قاتىناس جۇرگىزبەيدى»، - دەدى مينيستر.
ونىڭ اتاپ وتۋىنشە، پوليتسيا ميتينگىنى توقتاتۋ ءۇشىن تەك قانا ازاماتتاردىڭ ءومىرى مەن دەنساۋلىعىنا، قوعامدىق تارتىپكە قاۋىپ ءتونۋ، مۇلىككە زالال كەلتىرۋ، الەۋمەتتىك، ناسىلدىك، ءدىني الاۋىزدىقتى قوزدىرۋ، كونستيتۋتسيالىق قۇرىلىستى، اۋماقتىق تۇتاستىقتى كۇشپەن قۇلاتۋعا شاقىرۋ جاعدايلارىندا عانا تارتىلادى.
«تۋرا وسى الگوريتم قاڭتار وقيعالارىنىڭ العاشقى كۇندەرىندە قولدانىلدى. ەستەرىڭىزدە بولسا، 1-3-قاڭتار ارالىعىندا جينالعان ازاماتتار الەۋمەتتىك- ەكونوميكالىق ماسەلەلەردى كوتەردى. بۇل 6 وڭىردە - ماڭعىستاۋ، اتىراۋ، اقتوبە، تالدىقورعان، الماتى جانە استانادا بولدى. ۇكىمەت پەن اكىمدەر ماسەلەنى شەشۋ ءۇشىن بارلىق كۇش-جىگەرىن جۇمسادى. 4-قاڭتاردا بۇعان 8 ءوڭىردىڭ تۇرعىندارى قوسىلدى. ولار: شىمكەنت، كوكشەتاۋ، باتىس قازاقستان، پاۆلودار، شىعىس قازاقستان، جامبىل، قاراعاندى، قىزىلوردا وبلىستارى. بارلىق جەردە ءتۇسىندىرۋ جۇمىستارى جۇرگىزىلدى. ديالوگ ورناتىلدى. ءبىراق، وكىنىشكە وراي، اراعا كاسىبي ارانداتۋشىلار قوسىلدى. ولار حالىق اتىن جامىلىپ، زاڭسىز تالاپتار قويا باستادى. كوپشىلىككە دۇرىس ەمەس پىكىر بەرىپ، باسقارۋعا تىرىستى- شىندىقتى بۇرمالادى، پوپۋليستىك ۇراندار تاراتىلدى»، - دەدى مارات احمەتجانوۆ.