قىتاي كارانتين تالاپتارىن كۇشەيتكەن ەلدەرگە قاتىستى ۇندەۋ جاريالادى

بەيجىڭ. شينحۋا. قازاقپارات - قىتايدىڭ سىرتقى ىستەر مينيسترلىگىنىڭ مالىمدەۋىنشە، ەلدەر قابىلداپ جاتقان كوروناۆيرۋسپەن كۇرەس شارالارى عىلىمي نەگىزدەلگەن جانە ۇيلەسىمدى بولۋى ءتيىس.

سونداي-اق، ادامداردىڭ ءجۇرىپ- تۇرۋى ەلدەر اراسىنداعى ىنتىماقتاستىققا اسەر ەتپەۋى كەرەك، دەپ حابارلايدى قازاقپارات «شينحۋا» اقپارات اگەنتتىگىنە سىلتەمە جاساپ.

اتالعان ۇندەۋ تۋرالى ق ح ر سىرتقى ىستەر مينيسترلىگىنىڭ رەسمي وكىلى ماو نين ءمالىم ەتتى.

رەسمي وكىل باسپا ءسوز ءماسليحاتىندا پاندەميا باستالعالى قىتاي COVID-19 بەن كۇرەسكە باعىتتالعان حالىقارالىق بايلانىستار مەن الماسۋلارعا بەلسەندى قاتىسىپ كەلە جاتقانىن ايتتى.

ايتۋىنشا، كوروناۆيرۋسپەن كۇرەس جولىندا قىتاي حالىقارالىق قاۋىمداستىقتارمەن ونىڭ ىشىندە دۇنيەجۇزىلىك دەنساۋلىق ساقتاۋ ۇيىمىمەن ىنتىماقتاستىق ارتتى.

ماو نين ەلدەگى ەپيدەميولوگيالىق جاعداي مەن قابىلدانىپ جاتقان شارالار تۋرالى ايتا كەلە، كوروناۆيرۋسقا قاتىستى اقپارات ۋاقتىلى، اشىق ءارى زاڭعا ساي تاراتىلىپ جاتقانىن مالىمەدى.

«ءبىز تۇماۋ تۋرالى (GISAID) جاھاندىق دەرەكتەر الماسۋ باستاماسى اياسىندا قىتايداعى COVID-19 ينفەكسياسىنىڭ تارالۋىنىڭ سوڭعى جاعدايى بويىنشا ۆيرۋستىق گەنوم دەرەكتەرىن جاريالادىق»، - دەدى ماو نين.

سونداي-اق، سىرتقى ىستەر مينيسترلىگىنىڭ رەسمي وكىلى بىرنەشە كۇن بۇرىن قىتايدىڭ قۇزىرەتتى ورگاندارى دۇنيەجۇزىلىك دەنساۋلىق ساقتاۋ ماماندارىمەن بەينە- كونفەرەنسيا وتكىزگەنىن ايتتى. ەكى تاراپ قازىرگى COVID-19 جاعدايى، مەديتسينالىق ەمدەۋ، ۆاكسيناتسيا جانە باسقا دا تەحنيكالىق ماسەلەلەر بويىنشا پىكىر الماستى. ولار تەحنيكالىق الماسۋدى جالعاستىرۋعا جانە جاھاندىق پاندەميانى تەزىرەك جەڭۋدە بار كۇشىن سالۋعا كەلىستى.

كوپتەگەن ەلدىڭ دەنساۋلىق ساقتاۋ ماماندارى ءقازىر قىتايدا تارالىپ جاتقان COVID-19 شتامدارى بۇرىن باسقا جەرلەردە تابىلعانىن جانە پلانەتانىڭ كەز كەلگەن جەرىندە جاڭا نۇسقا پايدا بولۋى مۇمكىن ەكەنىن ايتتى. سوندىقتان قىتايلىقتار مەن اتالعان ەلدەن كەلگەن ازاماتتاردىڭ كىرۋىنە ارنايى شەكتەۋ ەنگىزۋدىڭ قاجەتى جوق.

ماو نيننىڭ ايتۋىنشا، قىتاي بارلىق ەلدە ىندەتكە قارسى شارالار عىلىمي نەگىزدەلگەن جانە ۇيلەسىمدى بولۋى كەرەك دەپ سانايدى. ساياسي ايلا-شارعى جاساۋ نەمەسە كەمسىتۋ بولماۋى ءتيىس. سونىمەن قاتار ادامدار قاتىناسى مەن ارالاسۋى ىنتىماقتاستىعىنا اسەر ەتپەۋى كەرەك.

ەسكە سالساق، قىتايدا كوروناۆيرۋسقا قارسى شەكتەۋلەردى ازايتقاننان كەيىن اۋرۋ جۇقتىرعاندار سانى ءوسىپ كەتكەن تۇستا ءبىرقاتار مەملەكەت قىتاي ەلىنەن كەلەتىن جولاۋشىلارعا جاڭا تالاپتار قويعان ەدى.

بۇعان دەيىن حابارلاعىمىزداي، قىتاي اۋرۋحانالارى ىندەت جۇقتىرعاندار اعىنىنا توتەپ بەرە الماي جاتىر.