تەرەكتى اۋداندىق اۋرۋحاناسىنان تۇسكەن مالىمەتكە قاراعاندا، قايعىلى وقيعا 31-جەلتوقسان كۇنى اۋدان ورتالىعى تەرەكتى اۋىلىندا بولعان. ساعات 13:20 دا 1 جاس 7 ايلىق ءسابي تەرەكتى اۋداندىق اۋرۋحاناسىنىڭ قابىلداۋ بولمەسىنە جەتكىزىلگەن. وندا تىرشىلىك بەلگىلەرى بولماعان. كەزەكشى دارىگەر مەن مەديتسينا قىزمەتكەرلەرىنىڭ جەدەل جانساقتاۋ شارالارىن جۇرگىزگەنىنە قاراماستان، جارتى ساعاتتان كەيىن، 13:50 دە بيولوگيالىق ءولىم تىركەلدى.
«اناسىنىڭ سوزىنە قاراعاندا، ۇيىندە ويناپ جۇرگەن ۇل بالا شيكى ءسابىز جەگەن. قاتتى جوتەلگەنىن ەستىگەننەن كەيىن وعان جۇگىرىپ جەتكەن اناسى كومەكتەسپەك بولىپ، ارقاسىنان قاققان. ءسابىزدىڭ ءبىر بولىگى شىققانىمەن، بالا كوگەرىپ، تىنىس الۋى قيىنداپ كەتكەن. جەدەل جاردەم شاقىرىپ، بالانى كوتەرىپ كوشەگە شىعىپ، ءوتىپ بارا جاتقان اۆتوكولىكپەن اۋرۋحاناعا اكەلگەن. بالانى قاراعان كەزدە ول دەمالماعان، باسقا دا تىرشىلىك بەلگىسى بولماعان. بارلىق ءىس- شارالار جۇرگىزىلگەننەن كەيىن پوليتسياعا حابارلانعان. بالانىڭ مۇردەسى ۋچاسكەلىك دارىگەر مەن پوليتسيا قىزمەتكەرىنىڭ قاتىسۋىمەن سوت- مەديتسينالىق ساراپتاماعا جىبەرىلدى. سوت- مەديتسينالىق ساراپتاما جۇرگىزگەن مامان بالانىڭ تۇنشىعىپ قايتقانى، تىنىس الۋ جولدارىنىڭ بوگدە زاتپەن (سابىزبەن) بىتەلىپ قالعانى جونىندە انىقتاما بەردى»، - دەپ حابارلادى اۋرۋحانادان.
وقيعانى ب ق و دەنساۋلىق ساقتاۋ باسقارماسى راستاپ، تەرەكتى اۋدانى بويىنشا 1,7 جاسار بالانىڭ ءولىمى تىركەلگەنىن جەتكىزدى.
اۆتور
عايساعالي سەيتاق