اتاپ ايتقاندا، ق. توقايەۆ «قازاقستان رەسپۋبليكاسىنىڭ قىلمىستىق جانە قىلمىستىق-پروتسەستىك كودەكستەرىنە ەكولوگيالىق قۇقىق بۇزۋشىلىقتار جانە ۆانداليزم كورىنىستەرى ءۇشىن جاۋاپتىلىقتى كۇشەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.
سونداي-اق پرەزيدەنت «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە ەكولوگيالىق قۇقىق بۇزۋشىلىقتار جانە ۆانداليزم كورىنىستەرى ءۇشىن اكىمشىلىك جاۋاپتىلىقتى كۇشەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.
زاڭداردىڭ ءماتىنى باسپا سوزدە جاريالانادى.
ايتا كەتەيىك، قۇجاتتار ۇلتتىق پاركتەردى جانە باسقا دا تابيعي بايلىقتاردى قورعاۋدى كوزدەيدى.
سەناتتىڭ اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ مالىمەتىنشە، بۇل قۇجات قر پرەزيدەنتىنىڭ 2020-جىلعى 14- قىركۇيەكتەگى جارلىعىمەن بەكىتىلگەن قۇقىق بۇزۋشىلاردى اكىمشىلىك جانە قىلمىستىق قۋدالاۋدى كۇشەيتە وتىرىپ، قازاقستاننىڭ تابيعي بايلىعىن قورعاۋدى كوزدەيتىن قۇقىقتىق شارالاردى دايىنداۋ جونىندەگى جالپىۇلتتىق ءىس-شارالار جوسپارىن ىسكە اسىرۋ ماقساتىندا ازىرلەندى.
زاڭ اياسىندا قازاقستاننىڭ ۇلتتىق ساياباقتارىن جانە باسقا دا تابيعي بايلىعىن ەكولوگيالىق زالالداردان: جەردى بۇلدىرۋدەن، اعاشتاردى زاڭسىز كەسۋدەن، ەرەكشە قورعالاتىن تابيعي اۋماقتاردى پايدالانۋ رەجيمىن بۇزۋدان، جەر قويناۋىن ءوز بەتىنشە پايدالانۋدان جانە قورشاعان ورتاعا قوعامدىق قاۋىپ توندىرەتىن وزگە دە ءىس-ارەكەتتەردەن قورعايتىن قۇقىقتىق نورمالار بەلگىلەنەدى.
ەكولوگيالىق زالال ءۇشىن جاۋاپتىلىقتى كۇشەيتۋ ماقساتىندا قىلمىستىق جانە قىلمىستىق-پروتسەستىك كودەكستەردە اعاشتار مەن بۇتالاردى زاڭسىز كەسكەنى، جويعانى نەمەسە زاقىمداعانى، جەر قويناۋىن ءوز بەتىنشە پايدالانعانى ءارى باسقا دا قۇقىققا قارسى ارەكەتتەر ءۇشىن جاۋاپتىلىق دەڭگەيى ارتتى. سونداي-اق ۆانداليزم كورىنىستەرى، قوعامدىق جانە جەكە مۇلىكتى بۇلدىرگەنى ءۇشىن جاۋاپتىلىقتى قاتاڭداتۋ كوزدەلگەن.