قازاق اقىندارىنىڭ جيناعى وزبەك تىلىندە جارىق كوردى - شەتەلدەگى قازاق باسپا ءسوزى
ەركىن جامانتاي ۇلى «جىلدىڭ ۇزدىك باپكەرى» اتاعىنا يە بولدى - «Kaznews»
بوكستان موڭعوليانىڭ قىزدار قۇراماسىنىڭ باپكەرى ەركىن جامانتاي ۇلى موڭعوليا بوكس قاۋىمداستىعىنىڭ شەشىمىمەن «جىلدىڭ ۇزدىك باپكەرى-2022» اتاعىنا يە بولدى، دەپ حابارلايدى موڭعوليانىڭ «Kaznews» اقپاراتتىق پورتالى.
بۇل جەتىستىككە ەركىن جامانتاي ۇلىنىڭ شاكىرتتەرى ەل بىرىنشىلىگى، ازيا چەمپيوناتى جانە الەم چەمپيوناتىندا جوعارى ناتيجە كورسەتىپ، ەل ابىرويىن اسقاقتاتقانى ءۇشىن بەرىلدى.
قازاقستان تۇركيادان بروندى كولىك الادى - TRT
قازاقستان قارۋلى كۇشتەرىندە جاڭادان قۇرىلعان ارنايى جاساق قولباسشىلىعى ءۇشىن تۇرىك كومپانياسى شىعارعان بروندى جاۋىنگەرلىك كولىكتەردى ساتىپ الۋ قاراستىرىلىپ جاتىر، دەپ حابارلايدى تۇركيا راديو تەلەۆيزيا پورتالى.
بۇل تۋرالى اتالعان باسىلىم ق ر قورعانىس ءمينيسترىنىڭ ورىنباسارى سۇلتان كامالەتدينوۆ ەلوردادا وتكەن باسپا ءسوز ءماسليحاتىندا ارمياداعى رەفورمالار تۋرالى اقپاراتىنا سىلتەمە جاساپ حابارلاعان.
ايتا كەتەيىك، كامالەتدينوۆ قاڭتاردا پرەزيدەنت قاسىم-جومارت توقايەۆتىڭ جارلىعىمەن قازاقستان قارۋلى كۇشتەرى قۇرامىندا ارنايى جاساق قولباسشىلىعى قۇرىلعانىن، اتالعان بولىمشەگە تاعايىندالاتىن ساربازدار ارنايى دايىندىقتان ءوتىپ، ولاردى قارۋ-جاراقپەن جاراقتاندىرۋ جۇمىستارى جۇرگىزىلگەنىن اتاپ وتكەن. وسى تۇرعىدا كامالەتدينوۆ تۇرىك فيرماسى شىعارعان بروندى سوعىس ماشينالارىن قاراستىرىپ جاتقاندارىن ايتتى.
«بۇدان بۇرىن «وتوكار» كومپانياسىنىڭ قازاقستاندا برونەترانسپورتەرلەر شىعارۋدى ماقسات ەتىپ وتىرعانى حابارلانعان بولاتىن»، دەپ جازدى تۇركيالىق ب ا ق.
ساعاتىنا 600 شاقىرىم جول جۇرە الاتىن پويىز جەلىگە قوسىلدى - «حالىق» گازەتى
28- جەلتوقساندا الەمدەگى العاشقى سۋتەگى ەنەرگەتيكالىق مۋنيتسيپالدى پويىزى سىچۋان ولكەسىنىڭ چەندۋ قالاسىندا رەسمي تۇردە جەلىگە قوسىلدى، دەپ حابارلايدى قىتايدىڭ «حالىق» گازەتى اقپاراتتىق پورتالى.
اتالعان باسىلىمنىڭ كەلتىرگەن مالىمەتىنە سۇيەنسەك، پويىز «سۋتەگى ەنەرگەتيكاسى» قوزعالتقىش جۇيەسىمەن جابدىقتالعان. كولىك ادەتتە ساعاتىنا 160 شاقىرىم جىلدامدىقپەن جۇرەدى. ال تولىق سۋتەگىن تولتىرعاندا 600 شاقىرىم جول جۇرۋگە مۇمكىندىگى بار.
قازاق اقىندارىنىڭ ولەڭدەر جيناعى وزبەك تىلىندە جارىق كوردى- «ءو ز ا» اقپاراتتىق اگەنتتىگى
قازاقستاندىق ءبىر توپ جاس اقىنداردىڭ ولەڭدەرى وزبەكشە «100 شەر» اتتى جيناقتا جارىق كوردى.
وزبەكستان مەن قازاقستان جازۋشىلار وداعى اراسىندا جاسالعان ىنتىماقتاستىق تۋرالى مەموراندۋمدا وزبەك پەن قازاق شىعارماشىل جاستارىنىڭ تۋىندىلارىن اۋدارۋ، باسىپ شىعارۋ جانە بىرلەسىپ تانىستىرۋ قاراستىرىلعان، دەپ حابارلايدى «ءو ز ا» اقپاراتتىق اگەنتتىگى.
اتالعان اقپاراتتىق اگەنتتىكتىڭ كەلتىرگەن دەرەگىنە سۇيەنسەك، وسىعان وراي وزبەكستان جازۋشىلار وداعىنىڭ حالىقارالىق بايلانىس جانە كوركەم اۋدارما ءبولىمىنىڭ مەڭگەرۋشىسى رۋستام مۋسۋرمانوۆ پەن «ەشليك» جۋرنالى باس رەداكتورى نۋريللا چورييەۆتىڭ اتسالىسۋىمەن 25 جاس قازاق اقىنىنىڭ جالپى سانى 100 گە جۋىق ولەڭى وزبەك تىلىنە اۋدارىلىپ، باسپادان شىقتى.
«100 شەر» جيناعىنىڭ تۇساۋكەسەرى تاشكەنتتەگى جازۋشىلار وداعىندا قازاقستاننان كەلگەن شىعارماشىل دەلەگاتسيانىڭ قاتىسۋىمەن وتكەن.
وزبەكستاننىڭ حالىق اقىنى سيروجيددين سايد پەن قازاقستانداعى «ادەبيەت الەمى» ورتالىعىنىڭ «جاس قالام» بىرلەستىگىنىڭ جەتەكشىسى مۇراتحان شوقان جيناقتى شاراعا قاتىسۋشىلارعا تانىستىردى.
وزبەكستاندىق باسىلىمنىڭ دەرەگىنشە، ايتۋلى سالتاناتتى شارادا ەكى حالىقتىڭ ۇلى تۇلعالارى الىشەر ناۋاي مەن اباي قۇنانبايەۆ، ايبەك پەن مۇحتار اۋەزوۆ، عافۋر عۇلام مەن ءسابيت مۇقانوۆ جانە باسقا دا كوپتەگەن بەلگىلى اقىن، جازۋشىلاردىڭ مۇراسى ورتاق بايلىعىمىز ەكەنى ەرەكشە اتاپ وتىلگەن.
ايتا كەتەيىك، بۇعان دەيىن وزبەك شايىرلارىنىڭ ولەڭدەرى قازاقشا اۋدارىلدى جانە «ءجۇز ولەڭ» دەگەن اتپەن جارىق كورىپ، تۇساۋكەسەر ءراسىمى الماتىدا وتكەن بولاتىن.
قىتايدا پاسپورت جاساتۋ، ۆيزا اشتىرۋدىڭ 8 نۇسقاسى جاريالاندى - CNR
اپتا باسىندا CNR اقپاراتتىق پورتالىندا «الاقاي، پاسپورت جاساتۋ، ۆيزا اشتىرۋ قالپىنا كەلدى» دەگەن اقپارات جاريالاندى.
بۇل قۋانىشتى حابار تۋرالى وسى اپتادا باسقا دا كوپتەگەن قىتايلىق باسىلمدار جارىسا جازعان بولاتىن.
قىتايلىق ب ا ق- تىڭ مالىمەتىنشە، اتالعان ەلدىڭ ۇلتتىق يمميگراتسيالىق اكىمشىلىگى 27- جەلتوقسان كۇنى حابارلاندىرۋ جاريالاعان.
وندا 2023-جىلدىڭ 8- قاڭتارىنان باستاپ ق ح ر ازاماتتارىنىڭ شەتەلگە ساياحاتتاۋى جانە دوستارىنا بارۋى ءۇشىن ادەتتەگى پاسپورتتى الۋعا وتىنىشتەرىن قابىلداۋ جانە بەكىتۋ بەلگىلەنگەن تارتىپپەن قالپىنا كەلتىرەتىندىگى ايتىلدى. سونىمەن بىرگە شەتەلدىكتەردىڭ ۆيزالاردى ۇزارتۋعا، جاڭارتۋعا جانە قايتا رەسىمدەۋگە وتىنىشتەرىن قابىلداۋ مەن بەكىتۋ دە رەتتەلەدى.
قىتايدىڭ «ورتالىق حالىق راديوسى» بۇل اقپارتىندا تولىق نۇسقاسىن جازىپ، اتالعان حابارلاندىرۋدىڭ 8 ءتۇرلى نۇسقاسىن جاريالاعان.
انكارادا ۇلت ۇستازىنا تاعى ءبىر رەت تاعزىم ەتىلدى - TRT
انكارادا ۇلت ۇستازىنا تاعى ءبىر رەت تاعزىم ەتىلدى. تۇركيانىڭ ەتيمەسگۋت مۋنيتسيپاليتەتىندە قازاقستاننىڭ تاۋەلسىزدىك مەرەكەسى جانە قازاق زيالىسى، مەملەكەت قايراتكەرى جانە بەلگىلى تۇركىتانۋشى احمەت بايتۇرسىن ۇلىنىڭ 150 جىلدىق مەرەيتويىنا وراي احمەت بايتۇرسىن ۇلىنىڭ ەسكەرتكىشى مەن ساياباعى سالتاناتتى تۇردە اشىلدى، دەپ حابارلايدى تۇركيا راديو تەلەۆيزيا پورتالى.
اتالعان ب ا ق- تىڭ مالىمەتىنشە، قازاق عۇلاماسىنىڭ 150 جىلدىعىنا ورايلاستىرىلعان شاراعا قازاقستاننىڭ تۇركياداعى ەلشىسى ەركەبۇلان ساپيەۆ، ەتيمەسگۋت مۋنيتسيپاليتەتى باسشىسى ەنۆەر دەميرەل، ديپلوماتيالىق ميسسيالاردىڭ، حالىقارالىق ۇيىمداردىڭ وكىلدەرى، قازاق دياسپوراسى مەن ستۋدەنتتەرى قاتىسقان.
ايتا كەتەيىك، ساياباقتىڭ اۋماعىنا ونداعان اعاش ەگىلىپ، تۇرعىنداردىڭ دەمالۋىنا ارنالعان سامالجايلار مەن سپورتتىق الاڭدار ورناتىلعان.
بەلگىلى ساۋلەتشىلەر ايدوس بۇركىتبايەۆ پەن تيمۋر ەرمۋحامەتوۆ جاساعان بۇل قولا مەن گرانيتتەن جاسالعان ەسكەرتكىشتىڭ جالپى بيىكتىگى 4 مەتر.
«حالىق سۇيەر دەپۋتات» راسۋل كۋشەربايەۆ رەسمي تۇردە وكىلەتتىگىن اياقتادى - «ءو ز ا» اقپارات اگەنتتىگى
وزبەكستانداعى وزەكتى پروبلەمالاردى كوتەرۋدەگى بەلسەندىلىگى، حالىقتى جىلدار بويى مەزى ەتكەن قيىن ماسەلەلەردى شەشۋدە باتىل قادام جاساعان دەپۋتاتتىڭ ءبىرى، قانداسىمىز راسۋل كۋشەربايەۆ رەسمي تۇردە دەپۋتاتتىق وكىلەتتىگىن اياقتادى، دەپ حابارلايدى «ءو ز ا» اقپارات اگەنتتىگى.
اتالعان اقپارات اگەنتتىگىنىڭ مالىمەتىنە سۇيەنسەك، وزبەكستان رەسپۋبليكاسىنىڭ ورتالىق سايلاۋ كوميسسياسى وليي ماجليس زاڭ شىعارۋ پالاتاسىنىڭ دەپۋتاتى راسۋل ءقىدىرالى ۇلىنىڭ وكىلەتتىگىن مەرزىمىنەن بۇرىن توقتاتۋ تۋرالى ماسەلەسىن قاراپ، كوميسسيا مۇشەلەرى ونىڭ وكىلەتتىگىن توقتاتۋدى ءبىراۋىزدان قولدادى.
بۇعان دەيىن ول ءوزىنىڭ Telegram ارناسىندا مانداتىن تاپسىرعىسى كەلەتىنى تۋرالى جازىپ، مالىمدەگەن بولاتىن.
«ءو ز ا» اقپارات اگەنتتىگىنىڭ دەرەگىنشە، راسۋل كۋشەربايەۆ ولي ماجليس زاڭ شىعارۋ پالاتاسىنىڭ دەپۋتاتى لاۋازىمىنداعى جۇمىسى بارىسىندا قوعامداعى وزەكتى پروبلەمالاردى كوتەرۋدەگى بەلسەندىلىگى، حالىقتى ۇزاق جىلدار بويى مەزى ەتكەن قيىن ماسەلەلەردى وڭتايلى شەشىم تابۋىنا باتىل قادام جاساعان. سول ارەكەتىنىڭ ارقاسىندا 2019-جىلدا وزبەكستاندا «جىل دەپۋتاتى»، 2020-جىل «جىل ادامى»، 2021-جىلى «حالىق سۇيەر دەپۋتات» مارتەبەسىنە يە بولعان .
اۆتور بەيسەن سۇلتان