بۇل تۋرالى قازاقپارات ۇكىمەتتىڭ رەسمي سايتىنا سىلتەمە جاساپ حابارلايدى.
ۇلتتىق ەكونوميكا ءمينيسترى الىبەك قۋانتىروۆ سايلاۋالدى باعدارلامانى ساپالى ورىنداۋ ءۇشىن جول كارتاسى ازىرلەنگەنىن ايتتى. وعان 117 تارماق كىردى، ءارتۇرلى باعىتتار بويىنشا جاۋاپتى مەملەكەتتىك ورگاندار مەن تاپسىرمالاردى ورىنداۋدىڭ ناقتى مەرزىمدەرى كورسەتىلدى.
سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسيننىڭ ايتۋىنشا، جول كارتاسىنىڭ ءاربىر تارماعى بويىنشا مونيتورينگ ناقتى ۋاقىت رەجيمىندە ينتەراكتيۆتى ونلاين- داشبورد ارقىلى جۇرگىزىلمەك. ياعني، قاعاز ەسەپتەر، انىقتامالار مەن پرەزەنتاتسيالار بولمايدى.
سونىمەن قاتار ورناتىلعان بەينەكامەرالاردىڭ كومەگىمەن ينفراقۇرىلىمدىق جانە ينۆەستيتسيالىق جوبالارعا ۆيزۋالدى باقىلاۋ جۇرگىزۋ مۇمكىندىگىن قاراستىرۋ جوسپارلانىپ وتىر. بۇل ونلاين رەجيمدە بارلىق جوبالاردىڭ ورىندالۋ بارىسىن باقىلاۋعا مۇمكىندىك بەرەدى.
پرەمەر- مينيستر رەسپۋبليكالىق شتاب وتىرىستارى تۇراقتى نەگىزدە وتكىزىلەتىنىن، ال جول كارتاسىنىڭ ورىندالۋى تۋرالى العاشقى ەسەپ 2023 -جىلعى 20-ساۋىرگە دەيىن دايىن بولۋى كەرەك ەكەنىن اتاپ ءوتتى.
«مينيسترلىكتەر مەن اكىمدىكتەردىڭ باسشىلارى جول كارتاسى بويىنشا جۇمىستى جەكە باقىلاۋىندا ۇستاۋى ءتيىس. پرەزيدەنتتىڭ سايلاۋالدى باعدارلاماسى - الداعى جەتى جىلعا ارنالعان نەگىزگى قۇجات. مەملەكەت باسشىسى ايتقان بارلىق تاپسىرمالاردى تولىعىمەن جانە ساپالى ىسكە اسىرۋعا ءتيىسپىز»، - دەدى ءاليحان سمايىلوۆ.
سونىمەن قاتار ۇكىمەت باسشىسى سيفرلىق تەحنولوگيالاردى قولدانۋ بارلىق جوسپارلانعان ءىس- شارالاردىڭ اشىق مونيتورينگىن جانە ءتيىمدى ورىندالۋىن قامتاماسىز ەتۋگە مۇمكىندىك بەرەتىنىن ايتتى.
«بۇل ءار تاپسىرمانى ىسكە اسىرۋ قاي ساتىدا ەكەنىن، قاي جەردە جۇمىستى جانداندىرۋ كەرەكتىگىن كورۋگە مۇمكىندىك بەرەتىن ىڭعايلى قۇرال بولادى. ەكىنشى جاعىنان، بۇل قاعاز جۇزىندە ەسەپ بەرۋدى ەداۋىر قىسقارتادى، ويتكەنى ءبارى ونلاين جۇرگىزىلمەك»، — دەپ تۇيىندەدى ءاليحان سمايىلوۆ.