قاڭتار وقيعاسىنا قاتىستى ماسەلە دەپۋتاتتاردىڭ ۇدايى نازارىندا بولادى - ەرلان قوشانوۆ

استانا. قازاقپارات - ءماجىلىس قاڭتار وقيعاسىنىڭ جاي-جاپسارىن تالداپ-تالقىلاۋدى جالعاستىرادى.

بۇل تۋرالى ءماجىلىس ءتوراعاسى ەرلان قوشانوۆ ايتتى، دەپ حابارلايدى قازاقپارات ءتىلشىسى.

«بۇگىن پارلامەنت ءماجىلىسىنىڭ وسى جىلداعى قورىتىندى جالپى وتىرىسىن وتكىزىپ وتىرمىز. ءبىر جىل ىشىندەگى وقيعالار مەملەكەتتىڭ، قوعامنىڭ بولمىسى مەن تابيعاتىن تۇبەگەيلى وزگەرتتى دەسەك، ارتىق ايتقاندىق ەمەس. جىل باسىنداعى «قاڭتار وقيعاسى» ءبارىمىز ءۇشىن اۋىر سىناق ءارى ساباق بولدى. سول سىناقتارعا جاۋاپ رەتىندە، مەملەكەت باسشىسى قاسىم-جومارت كەمەل ۇلى توقايەۆ ەلدە كەڭ كولەمدى ءارى باتىل ساياسي رەفورمالاردى قولعا الدى. بۇل وڭ وزگەرىستەردى جالپىحالىقتىق رەفەرەندۋمدا ازاماتتارىمىزدىڭ قىزۋ قولداعانىنا ءبارىمىز كۋامىز. وزدەرىڭىز دە بىلەسىزدەر، قازىرگى ۋاقىتتا ەل ازاماتتارىنىڭ ەرتەڭگى كۇنگە دەگەن ءۇمىتى ويانىپ، سەنىمى ارتىپ كەلەدى. ەڭ باستىسى، ءبىز وسى سەنىمدى جوعالتىپ الماۋىمىز كەرەك»، - دەدى ە. قوشانوۆ ءماجىلىستىڭ جالپى وتىرىسىندا.

ونىڭ ايتۋىنشا، بيىل ءماجىلىس قاراۋىندا 154 زاڭ جوباسى بولدى. سونىڭ 93 ى تالقىلانىپ، سەناتقا جولدانعان. بۇل قۇجاتتاردىڭ 75 ىنە پرەزيدەنت قول قويدى.

«العاش رەت ماجىلىستە «قاڭتار وقيعاسىن» تەرگەۋ بارىسىنىڭ الدىن الا قورىتىندىسىن اشىق تۇردە تىڭدادىق. تاۋەلسىز قازاقستان تاريحىنىڭ ەڭ ءبىر قايعىلى پاراعىنا اينالعان قاندى وقيعانىڭ جاي- جاپسارىن تالداپ- تالقىلاۋ جالعاسا بەرمەك. بۇل كۇردەلى ماسەلە دەپۋتاتتاردىڭ ۇدايى نازارىندا بولادى. جاڭا جىل باسىنداعى العاشقى جيىنداردىڭ بىرىندە وعان تاعى دا ارنايى ورالامىز. سونىمەن قاتار ءبىز وسى جىلدىڭ ىشىندە بارلىق وڭىرلەردە، اۋىل- ايماقتا بولدىق. جۇرتشىلىقتىڭ مۇڭ- مۇقتاجىن ءبولىسىپ، اشىق، قويان- قولتىق جۇمىس ىستەدىك. وسى ءۇردىس الداعى ۋاقىتتا دا بەلسەندى تۇردە جالعاسۋى كەرەك دەپ سانايمىن»، - دەدى ءماجىلىس ءتوراعاسى.

سونىمەن قاتار ول 2023 -جىلى پارلامەنت ءماجىلىسى ءوز جۇمىسىن جاڭا كونستيتۋتسيالىق جاعدايدا باستايتىنىن ەسكە سالدى. ءماجىلىس زاڭداردى دەربەس قابىلدايتىن بولادى.