رەسەي قازاقستاندىق مۇنايدىڭ گەرمانياعا ترانزيتىن قولداۋعا دايىن
«قازترانسويل» ا ق 2023 -جىلى 1,2 ميلليون توننا قازاقستان مۇنايىن «ترانسنەفت» ج ا ق ماگيسترالدى مۇناي قۇبىرىمەن «اداموۆا زاستاۆا» مۇناي بەكەتى ارقىلى گەرمانياعا جەتكىزۋگە ءوتىنىم بەردى.
مۇنايدىڭ بۇل ترانزيتى قازاقستان مەن رەسەي ۇكىمەتى اراسىنداعى 2002 -جىلعى 7-ماۋسىمداعى كەلىسىم شەڭبەرىندە جۇزەگە اسادى.
«ايتا كەتۋ كەرەك، قازاقستاندىق مۇنايدى بەلارۋس اۋماعى ارقىلى تاسىمالداۋ ءۇشىن «قازترانسويل» ا ق مەن «گومەلترانسنەفت درۋجبا» ا ا ق اراسىندا مۇناي تاسىمالداۋ بويىنشا قىزمەت كورسەتۋگە شارت جاسالىپ، ىسكە اسىپ جاتىر» دەلىنگەن باسپا ءسوز قىزمەتىنىڭ حابارلاماسىندا.
رەسەي قازاقستاننىڭ «درۋجبا» قۇبىرى ارقىلى گەرمانياعا مۇناي ترانزيتىن قولداۋعا دايىن.
بۇل تۋرالى تاسس اگەنتتىگىنە رەسەي ۆيتسە-پرەمەرى الەكساندر نوۆاك ءمالىم ەتكەن.
«ءيا، - دەدى ول وسى سۇراققا جاۋاپ بەرىپ. - ءبىز بۇعان وڭ قارايمىز».
Deutsche Welle قازاقستاننىڭ گەرمانيا شىعىسىنداعى شۆەدت مۇناي وڭدەۋ زاۋىتىنا «درۋجبا» قۇبىرى ارقىلى جەتكىزىلەتىن مۇنايدى ۇلعايتقىسى كەلەتىنىن جازادى.
شۆەدتەگى م ءو ز «درۋجبا» قۇبىرىنا قوسىلعان، سول ارقىلى رەسەيدىڭ «روسنەفت» مەملەكەتتىك كونتسەرنىنەن مۇناي الادى.
ءۇش مىڭعا جۋىق ادام جۇمىس ىستەيتىن شۆەدت زاۋىتى گەرمانيانىڭ شىعىسىن بەنزينمەن جانە باسقا وتىنمەن قامتاماسىز ەتۋدە ماڭىزدى ءرول اتقارادى.
ول سونداي-اق پولشانىڭ كەيبىر باتىس اۋداندارىن جانە بەرلين-براندەنبۋرگ اۋەجايىن جانارمايمەن قامتاماسىز ەتەدى. كاسىپورىن اكتسيالارىنىڭ كوپشىلىگى «روسنەفت» كونسەرنىنە تيەسىلى بولدى.
قاراشا ايىندا بۇل زاۋىت گەرمانياعا سەنىمگەرلىك باسقارۋعا بەرىلدى.
ەسكە سالا كەتەيىك، بۇعان دەيىن «قازمۇنايگاز» باسشىسى ماعزۇم مىرزاعاليەۆ قازاقستاندىق مۇنايدى گەرمانياعا ەكسپورتتاۋ ماسەلەسى بويىنشا كەلىسسوز جۇرگىزگەن بولاتىن.
ق م گ باسشىسى قازاقستان مۇنايىن اتالعان مۇناي قۇبىرى ارقىلى گەرمانياعا ەكسپورتتاۋ مۇمكىن ەكەنىن، الايدا كەلىسىمشارت جانە تەحنيكالىق ماسەلەلەردى شەشۋ قاجەتتىگىن اتاپ ءوتتى.
«ق م گ مۇناي ءوندىرۋشى ۇيىمدارىنىڭ شيكىزاتى قازاقستاننىڭ ىشكى نارىعىنا مۇناي ونىمدەرىن جەتكىزۋ مىندەتتەمەسىن ورىنداۋ ءۇشىن وتاندىق مۇناي وڭدەۋ زاۋىتتارىنا جىبەرىلەدى. ال ق م گ مۇنايىنىڭ ەكسپورتقا شىعاتىن كولەمى ءبىرىڭعاي جۇيەلىك ترەيدەر - KMG Trading مەكەنجايىنا جەتكىزىلەدى، ول الدىمەن «قازمۇنايگازدىڭ» رۋمىنياداعى مۇناي وڭدەۋ زاۋىتتارىنىڭ قاجەتتىلىگىن وتەيدى. ەكسپورتقا ارنالعان مۇنايدىڭ قالعان كولەمى ۇزاقمەرزىمدى كەلىسىمشارت بويىنشا ساتىلادى. سونىمەن قاتار، «قازمۇنايگاز» ق ر پرەزيدەنتىنىڭ تاپسىرماسىنا سايكەس، گەرمانياعا سىناق رەتىندە مۇناي پارتياسىن 2023 -جىلدىڭ قاڭتار ايىندا جونەلتۋ مۇمكىندىگىن قاراستىرىپ جاتىر»، - دەدى م. مىرزاعالييەۆ.
سونداي-اق «قازمۇنايگاز» قازاقستاننان گەرمانياعا مۇناي جەتكىزۋ ءۇشىن قانداي باعىتتار قاراستىرىلىپ جاتقانىن ايتتى.