بۇل تۋرالى قازاقپارات سىبايلاس جەمقورلىققا قارسى اگەنتتىككە سىلتەمە جاساپ حابارلايدى.
«جەدەل وڭدەۋ ناتيجەلەرى بويىنشا قازاقستان تەمىر جولى ەنشىلەس كاسىپورىندارىنىڭ ءبىرىنىڭ، اتاپ ايتقاندا قازاقستان رەسپۋبليكاسى جۇك ۆاگون پاركىنىڭ ءىرى وپەراتورى بولىپ تابىلاتىن «قازتەمىرترانس» اكتسيونەرلىك قوعامىنىڭ لاۋازىمدى ادامدارىن زاڭسىز بايىتۋدىڭ قىلمىستىق سحەماسى اشىلىپ، جولى كەسىلدى. قوعامنىڭ جانە ونىڭ وڭىرلىك فيليالدارىنىڭ لاۋازىمدى تۇلعالارى جۇك ۆاگوندارىنىڭ تاپشىلىعىن پايدالانا وتىرىپ، كەيبىر جاعدايلاردا وسىنداي تاپشىلىقتى جاساندى تۇردە جاساي وتىرىپ، پروبلەمالاردى شەشۋدىڭ ورنىنا، وسى جاعدايدى وزدەرىنىڭ پايداكۇنەمدىك ماقساتتارىندا پايدالانعان. جۇك ۆاگوندارىن كەدەرگىسىز جانە جەدەلدەتىپ بەرگەنى ءۇشىن كاسىپكەرلەردەن جۇيەلى نەگىزدە پارا العانى انىقتالدى»، - دەلىنگەن اگەنتتىك حابارلاماسىندا.
سونىمەن قاتار تۇراقتى پارا الۋدىڭ بەلگىلەنگەن سحەماسىنا فيليالداردىڭ قىزمەتكەرلەرى مەن باسشىلارى، سونداي-اق باس كەڭسە بولىمشەلەرىنىڭ مەنەدجەرلەرى مەن باستىقتارى قاتىستى بولىپ شىققان.
«اقشا قاراجاتتارى، ادەتتە، لاۋازىمدى تۇلعالاردىڭ نەمەسە ولاردىڭ سەنىمدى ادامدارىنىڭ، ونىڭ ىشىندە جاقىن تۋىستارىنىڭ كارت-شوتتارىنا اۋدارىلىپ وتىرعان. قوعامنىڭ اقمولا فيليالىنىڭ ءبىر عانا باسشىسى 2020 -جىلدان باستاپ 70 ميلليون تەڭگەدەن استام قاراجاتتى زاڭسىز الىپ، ونىڭ باسىم بولىگىن شۋچە- بۋراباي كۋرورتتىق ايماعىنىڭ ويىن مەكەمەلەرىنە جۇيەلى تۇردە بارۋ ارقىلى جۇمساعان. قوعامنىڭ قاراعاندى فيليالىنىڭ بۇرىنعى جانە قازىرگى باسشىلارى دا وسىنداي قىلمىستار جاسادى دەپ كۇدىكتەلۋدە. بارلىق اتالعان ادامدار ۇستالدى جانە تەرگەۋ سوتىنىڭ سانكسياسىمەن 2 ايعا قاماۋعا الىندى. سونداي-اق، اقشالاي قاراجاتتى زاڭسىز الۋدا قىزىلوردا فيليالىنىڭ باسشىسى مەن قوعامنىڭ ورتالىق اپپاراتىنىڭ ءبىرقاتار قىزمەتكەرلەرى اشكەرەلەندى. باسقا لاۋازىمدى تۇلعالاردىڭ قاتىسۋى تەكسەرىلۋدە. ايتا كەتسەك، جۇك ۆاگوندارىنىڭ ۋاقتىلى جەتكىزىلمەۋىنە بايلانىستى جۇك جونەلتۋشى كاسىپورىندار جەتكىزىلىمدەردىڭ بۇزىلۋىنا جول بەرەدى، ۇلكەن شىعىنعا ۇشىرايدى جانە پارا بەرۋ ارقىلى ءوز ماسەلەلەرىن شەشۋگە جۇگىنۋگە ءماجبۇر. سونىمەن بىرگە، بۇل شىعىنداردىڭ بارلىعى تاۋارلار باعاسىنىڭ وسۋىنە اسەر ەتەدى»، - دەدى اگەنتتىك.