قىزمەتكەرلەر ارنايى تەحنيكالارىن ساقتاپ قالۋ ءۇشىن سوڭىنا دەيىن كۇرەستى. ويران سالۋشىلار ولارعا ءورتتى سوندىرۋگە كەدەرگى كەلتىرىپ، ۇرىپ-سوعىپ، جاراقاتتاۋعا تىرىستى. دەگەنمەن، الماتىلىق ءورت سوندىرۋشىلەر وزدەرىنىڭ قىزمەتتىك بورىشىن ادال ورىنداپ، مەگاپوليستىڭ كۇلگە اينالۋىنا جول بەرمەدى. «قازاقپارات» ح ا ا رەداكسياسى «قاڭتار» ارنايى ايدارى اياسىندا وسى قيىن ساتتەردى باسىنان وتكەرگەن ءورت ءسوندىرۋشىنىڭ وقيعاسىن بايانداماق.
الماتى قالاسىنىڭ 5№ مامانداندىرىلعان ءورت ءسوندىرۋ ءبولىمىنىڭ قۇتقارۋشىسى زاڭعار بازاربەك قاڭتار وقيعاسى كەزىندە جاراقاتتاندى. ءبىراق، ول ءوزىنىڭ ومىرىنە ءقاۋىپ ءتونىپ تۇرعانىنا قاراماستان جۇمىسىن جالعاستىردى.
«5- قاڭتاردان 6- قاڭتارعا قاراعان ءتۇنى 5№ مامانداندىرىلعان ءورت ءسوندىرۋ بولىمىنە «قونايەۆ، 135 مەكەنجايىندا ەلەكتر قالقانى جانىپ جاتىر دەگەن» جەدەل اقپارات تۇسەدى. سول كەزدە ءبىر توپ ادام جينالىپ، ءورت ءسوندىرۋ قىزمەتىنىڭ اۆتوكولىگىنە شابۋىل جاساي باستايدى. ولار 5№ ءورت ءسوندىرۋ ءبولىمىنىڭ اۆتوكولىگىن كۇشپەن تارتىپ الىپ كەتەدى. فورمانى تاستاپ، كيىمدى اۋىستىرۋىمىزعا تۋرا كەلدى. كوشەنى ارالاپ جۇرگەندە ءبىزدىڭ جەكە اۆتوكولىككە وق اتىلدى جانە ول رولدە وتىرعان ماعان كەلىپ ءتيدى. سول قولىما الدەنە تيگەنى ءبىلىندى. باسىندا اينانىڭ سىنىقتارى، ۇشقىندارى دەپ ويلادىم. سودان بولىمگە كەلىپ، العاشقى كومەك كورسەتىلدى»، - دەيدى ءورت ءسوندىرۋشى.
قازاقپارات كومانداسى الماتىدا دا، قازاقستاننىڭ وزگە وڭىرلەرىندە دە قاڭتار قاسىرەتى كەزىندە قىلمىسكەرلەر مەن توناۋشىلاردىڭ ارەكەتىن ءوز كوزىمەن كورگەن وقىرماندارىمىز از ەمەس ەكەنىنە سەنىمدى.
وقىرماندى ءوز وقيعالارى جايلى اڭگىمەلەپ بەرۋگە شاقىرامىز. بىزگە مىنا ەلەكتروندى پوشتا ارقىلى حات جازۋعا بولادى:
kazred@inform.kz
rusred@inform.kz
بىزبەن الەۋمەتتىك جەلىلەر ارقىلى دا بايلانىسۋعا بولادى:
Telegram: @qazaqparat_kz, @kazinform_news
Facebook: @KazakparatKZ، @كازينفورم
Instagram: @qazaqparat_kz, @kazinform.
قاڭتار قاسىرەتى جايلى ايتىلماعان وقيعا قالماۋى كەرەك.